NIKABAD og dagan ang usa ka 17-anyos nga dalaga dihang nakit-an niyang nagduwa sa iyang kinatawo ang Amerikano nilang silingan nga iyang gimasahian.
Nahitabo kini sulod sa balay sa Kano sa may Aldea Subdivision, Timpolok, Babag 1, dakbayan sa Lapu-Lapu, pasado alas 10 sa gabii niadtong Biyernes.
Ang gireklamo mao ang usa ka 60 anyos nga Kano (tinuod ngan gipugngan samtang wa pa mapasakai og kaso), naminyo og usa ka Pinay ug aduna silay duha ka mga anak.
Samtang ang mireklamo mao ang usa ka Anna (di tinuod niya nga ngan), 17, nagpuyo sa maong lugar.
Matod sa kapulisan nga ang biktima katabang sa silingang balay apan magtabok-tabok lang sa gipuy-an sa langyaw.
Si Police Officer 1 Glenn Estrada, desk officer sa Poblacion Police Station nga nahinabi sa Sun.Star Superbalita, nibutyag nga sigun pa sa biktima nga atol sa hitabo wa diha ang asawa sa suspek sa dihang mihangyo kini nga magpamasahe.
Apan samtang siya nagmasaahe, kalit nga niatubang kaniya ang langyaw ug dayog duwa sa iyang kinatawo.
Gumikan sa iyang kahadlok, nidagan siya ug niadto sa iyang kaila aron pagsumbong sa hitabo.
Gialarma sa kapulisan ang Kano ug nasikop.
Matod ni Estrada nga dugay nang nagpuyo ang langyaw dinhi sa nasud.
Ang suspek kasamtangang gitanggong sa ilang presento.
Posibleng pasakaan og kaso ang langyaw.
“Kana og dili magkasinabot kay sa among nahibaw-an morag pasayluon ra man unya gihangyo. Maorag giestorya ang biktima,” asoy ni Estrada nga nahinabi sa Sun.Star Superbalita.