DEPENSAAN ni World Boxing Organization (WBO) Intercontinental superbantamweight champion Genesis “Azukal” Servania ang iyang titulo karong Agusto 29, 2014 sa laing Pinoy Pride series nga ipahigayon didto Dubai International Convention & Exhibition Center sa Dubai.

Kini maoy unang higayon nga ang Pinoy Pride ipasundayag sa gawas sa nasod.

Giulohan ug Pinoy Pride 27 – Duel in Dubai, mosuway paglangkat sa titulo

ni Servania (24-0, 10 KOs) ang Mehikanong si Jose “Matador” Cabrera sa

gikatakdang 12 ka round.

Gituohan nga makabaton og malisod nga dalan si Servania sa maong

pagdepensa sanglit si Cabrera, lumad nga taga Tamaulipas, Mexico adunay

impresibong 22-4-, 10 KOs ug duha ka tabla sa 28 ka away niini.

Hinuon sa uwahi niyang away niadtong Mayo, si Cabrera napildi sa beteranong si Tomas Rojas pinaagi sa knockout sa ikawalo nga round.

Kini maoy ikaduhang pagdepensa ni Servania sa iyang titulo human usab sa

iyang makutas nga kadaugan batok ni Alexander Munoz niadtong Marso 1 sa Solaire Hotel and Casino sa Paranaque City, Manila pinaagi sa unanimous decision.

Moaway usab ang comebacking sensational nga si Rey “Boomboom” Bautista

ug ang laing Ala Boy nga si IBF International jr. bantamweight champion

“King” Arthur Villanueva sa maong card.

Si Bautista (35-3, 25 KOs) makigsinukliay sa iyang kumo batok sa laing

Mexicano nga si Juan Jose “Piquet” Martinez samtang si Villanueva modepensa sa iyang titulo batok sa Nicaraguan fighter nga si Henry “El Crespo” Maldonado sa 12 rounds. (JBM)