PAKYAS ang nahabiling Pinoy nga si Elmer Haya sa iyang kampanya sa World 9-ball Championship human kini mapukan sa beteranong Dutchman nga si Niels Feijen sa semifinals, 11-7, sa Al Saad Sports Club sa Doha, Qatar.
Si Haya kinsa nagbase na karon sa Abu Dhabi isip usa ka pool teacher sa usa ka pool hall, giabibahan sa gatosan ka mga Filipino overseas workers kinsa tuyong misaksi sa kombati.
Sikit ug kulbahinam ang gipakita sa duha sa sayong mga racks sa maong panag-engkuwentro. Pulos usab nakamugna og mga importanting kasaypanan ang matag habig.
Apan nagsugod og arangkada ang kainit ni Feijen sa tungatungang bahin samtang nakasinati na usab og pressure si Haya.
Ug sa dihang nasipyat ang kanhi Sun.Star Superbalita champion sa ball no. 9 aron unta pagtabla, 7-7, wa dayon usiki ni Feijen ang kahigayonan ug didto nasakmit niya ang momentum sa duwa nga maoy iyang gigamit ngadto sa kadaugan.
Sa finals, gipildi usab ni Feijen ang taga Austria nga si Albin Ouschan, 13-10, aron langkaton ang titulo,
Kini maoy unang World 9-ball title ni Feijen sukad sa iyang pagsulod sa professional billiard player mga 15 na ka tuig ang milabay.
Sa kadaugan, si Feijen mibulsa sa $30,000 samtang si Ouschan miuli nga dala ang $15,000. (JBM)