NABANIOG na sa kadaghanan kon unsa gyud kadako ang interest sa Cleveland Cavaliers sa star player sa Minnesota Timberwolves nga si Kevin Love.
Apan wa lang gyud sila mohagad og trade hangtod nga dili pa sila siguro kon magdugay ba si Love sa ilang kampo.
Pero sa uwahing kalambuan, si Love pinaagi sa iyang agent, mipadayag nga andam siya moduwa sa Cleveland molampos man gani ang Cavaliers sa pagkuha og balik ni LeBron James pinaagi sa free agency.
Matod pa sa taho sa ESPN nga 100 percent nga mopirma si Love sa Cleveland kon matuman ang iyang kondisyon.
Sama ni LeBron si James anaa na usab sa free agency nga mao karon ang gitutokan karon og maayo sa pipila ka mga teams.
Gumikan niini, gilihok na karon sa Cavaliers ang tanan nilang mahimo aron mabira nila og balik si James kinsa nagsugod og duwa sa NBA sa kampo sa Cleveland sulod sa pito ka tuig sa wa pa kini mobalhin sa Miami Heat aron nakighugpong nila ni Dwyane Wade ug Chris Bosh.
Sa niaging semana, ang asawa ni James, sa iyang twitter daw sa mipasumbingay sa paghibalik unya sa iyang bana sa Cleveland, ang dapit nga natawhan ni James.
Lakip sa nagtinguha usab ni James ang Dallas Mavericks ug Houston Rockets.
Samtang ang Dallas nangita karon og paagi nga mahaw-angan ang ilang salary cap, ang Rockets mi-release na usab og mga players aron mapadak-an ang ilang tanyag ni James.
Usa na sa gibuhian sa Rockets mao ang ilang power forward nga so Omar Asik. Andam usab sila mobuhi ni Chandler Parsons ug ni Jeremy Lin. (JBM)