GI-WITHDRAW dayon sa Ombudsman ang ilang motion sa pag-amendar sa information sa kasong plunder ug graft nga ilang nasang-at batok nila ni Senador Bong Revilla, Jinggoy Estrada, Juan Ponce Enrile ug kaubanan.

Kini human mibahad ang Sandiganbayan nga mahimong makagawas sila si Revilla ug Estrada gikan sa ilang detention cell kon tugtan ang mao nga motion.

Akong nahinabi sa akong programa Straight to the Point sa dyHP si Retired Cebu Executive Judge Meinrado Paredes. Si Paredes kinsa tinahod nga professor sa Remedial Law niingon nga gitugot sa balaod ang pag-amendar sa information sa kaso.

Ang amendment mahimo nga pormal ug substantial. Ang pormal dili mag-usab sa argumento sa prosecution. Mahimo nga ila kining himuon sama pananglitan sa pagkoriher sa spelling sa ngalan sa sinumbong. Apan ang substantial kay duna gyoy pag-usab sa argumento sa information sa kaso.

Matod ni Paredes, nga wala magpasabot nga hu­yang na ang kaso batok sa mga sinumbong tungod sa unang tinguha sa pag-amendar sa information. Posib­le lang nga dunay mga butang nga wala lang dayon nabantayi sa Ombudsman.

Ugmang adlawa, ipaubos na og arraignment si Estrada. Pangutan-on siya sa Sandiganbayan kon sad-an o dili sad-an sa mga kaso nga iyang giatubang. Una nang napaubos og arraignment si Revilla kinsa wala mitubag, busa ang Sandiganbayan mibutang og not guilty sa iyang plea.

Sa habig ni Enrile, gipaabot nga molusot ang warrant of arrest batok niya. Apan tungod sa iyang edad nga 90 anyos, posib­le nga ipaubos lang siya og hospital arrest sama sa gihimo ni kanhi Presidente Gloria Arroyo.

Samtang si Justice Secretary Leila De Lima mikonpirmar nga dunay ikatulo nga batch sa mga magbabalaod nga may kalambigitan sa pork barrel scam ang mapasakaan usab og kaso.

Sumala sa tinubdan nga dunay laing Senador ang pasakaan usab og kaso.

Daw duna nay bidlisiw sa kahayag nga nakit-an ang katawhan sa paglutos sa mga dagkong kawatan sa atong buhis. Unta, matarong sa Department of Justice (DOJ) ug sa Ombudsman ang pag-imbestigar ning binilyon ka pesos nga anomaliya.

Kinahanglang ihan-ay daan sa DOJ ang sangkap nga mga ebidensya sa dili pa nila isaka ang kaso. Sa habig sa Ombudsman, maayo nga tun-an usab og tarong ang mga kaso sa dili pa nila isaka ngadto sa Sandiganbayan.

Sa dili pa matapos ang termino ni PNoy sa tuig 2016, kabahin sa iyang ikabilin nga legasiya nga nakapapreso siya sa mga dagkong kawatan.