UNSAON pagpakihol aron magtinarong og lihok ang gapabuta-bungol? Pastilan, kiber ra gihapon ang presidente. Wa’y lihok, lupi’g pa’y nabulit sa iyang muta ug atuli.
Bahala’g hayag pa sa sinaw sa iyang opaw ang dan-ag sa maayong buhat sa giila nga Superstar samtang banha kaayo ang mga mamumuo sa kulturanhong kinabuhi sa nasod—ug dili lang ang Noranians—sa ulahing pagsalikway niya ni Nora Aunor isip National Artist (Film and Broadcast Arts)! Kini ang pag-ila ni Nora sa mga panel of experts gikan sa National Commission for Culture and the Arts (NCCA) ug Cultural Center of the Philippines (CCP) nga gitahasan sa presidente sa paghukom kon kinsa’y angay pasidunggan isip bag-ong mga National Artists. Tuod man—gumikan sa mga pasundayag nga mugna ni Nora sa pelikula ug telebisyon nga gibantog ang kahawod dili lang dinhi sa nasod ug gawas —nangharos og taas kaayo iyang puntos labaw pa sa ubang mga nominado pagka-National Artists sa lainlaing natad sa pagmugna (panulat, musika, pamintal, ug uban pa). Ug gitahod baya ning taga-NCCA ug CCP sa katilingban sa arts and culture kay nanggungis na pod ni sila sa ilang mamugnaon nga kahanas ug kaligdong. Mao bitaw ni nga sila gyo’y gisaligan sa pamunoan sa nasod aron mao’y mohagdaw gikan sa kuti kaayo nga pamaagi sa paghashas kon kinsa’y angay ituboy nga National Artists ngadto sa palasyo sa Malacañang. Gani, nakapasar pa gyod gani si Nora sa honors committee diha sa Office of the President. Apan, pastilan, sa dihang gipadayag na Noynoy ang mga napili, kurat nga milagro kay wala man niya giapil si Nora. Hastang lawgawa!
Lupig pa’y giluwa niya ang gidalit sa taga-NCCA ug CCP, lakip ang pamatuod sa iyang kaugalingong honors committee, bisan pa’g sila mao’y gisangonan niya kon unsa’y angay dili lang alang niya apan labi na sa kaayohan sa nasod. Kay lagi duna kuno siya’y katungod pagtaktak pinaagi sa gitawag nga presidential discretion. Pwes, magbuot mo?
Naa’y mga hungihong nga gisaway kuno niya ang moralidad ni Nora. Kay nalambigit kini niadto sa drug case sa Los Angeles kanhi. Apan sa tinuod lang, wala mapamatud-i sa hukmanan sa Amerika nga adik si Nora ug walay police record. Kon nahukman pang sad-an, hagbay ra unta siyang gi-deport ug dili na makabalik sa Amerika diin siya duna’y permanent residency sa pagkakaron.
Ay, bisan sa pagpili sa atong mga politiko, dayag nga wa po’y panginlabot sa moralidad kitang mga botante kay sagad mga sungayan ma’y atong gipangbotaran. Ug kon moralidad pod mao’y pasikaran sa pagpili sa kaugalingong igsoon, tan-awon ta lang kon unsa siya kabangis nga mouyon himoong manghod si Kris? Aguroy, dayag kaayo kon unsa’y angay untang mopatigbabaw-- ang tataw nga abilidad ni Nora, o taphaw nga moralidad ni Noynoy?