NAKABUWELO na ang klase sa tanang ang-ang sa edukasyon ning tuig tingtungha 2014-2015. Alegre na usab ang kalihokan sa mga tinun-an sa sulod ug gawas sa tunghaan labi na sa pagpangdani sa pagsulod og fraternites ug sororities.

Ang extra curricular activities sa mga tinun-an kabahin sa pag-umol sa edukasyon ug ma­ayong hawanan sa pagbansay sa umaabot nga lider sa nasod.

Apan kinahanglan nga magbantay ang mga tinun-an nga dili makasulod sa grupo nga magdala na hinuon ngadto sa kaalautan human malambigit sa away sa fraternities, pagkagumon sa bisyo ug mawala na sa pagtutok sa pag-eskuwela nga nag-unang hinungdan nganong ania sa dakong dakbayan.

Simbako, dili lang mahitabo sa Sugbo ang labing ulahing hitabo sa bahin sa hazing. Usa ka tinun-an sa De La Salle-College of St. Benilde (CSB) ang patay sa hazing sulod sa condo unit sa Taft Avenue sa Manila, alas 9:30 sa gabii niadtong Sabado.

Laing tulo ka tinun-an sa samang tunghaan ang gidala sa tambalanan tungod sa daghang bun-og.

Sumala sa Manila Police District (MPD), ang ha­zing gihimo sa Unit 2907 sa One Archers Place sa Taft Avenue apan, diha na nasayod ang mga guwardiya bahin sa hitabo tungod sa pag-abot sa ambulansiya sa Red Cross nianang alas 11:00 sa gabii.

Usa ka Guillo Cesar Servando, 18, second year Hotel and Restaurant Management student sa St. Benilde, gideklarar nga dead-on-arrival sa ospital.

Dili ba makaluluoy? Laing kaugmaon ang naguba ug damgo sa mga ginikanan nga nalusno.

Dili sa­yop ang pag-apil og grupo, bisan fraternities, apan kina­hanglang maniid sa klase sa mga tawo nga nagpalibot kanimo. Mas labing maayo nga motutok sa pagtuon.