WALA gihapon mawala ang kontrobersiya sa pagtagak sa Malacañang sa banggiitang aktres nga si Nora Aunor isip National Artist.

Sa pagkakaron, plano sa pipila ka supporters ni Aunor nga magpasaka og apela sa Supreme Court.

Gipaneguro sab sa National Commission for Culture and the Arts (NCCA) na suportado nila si Aunor kung ugaling magreklamo sa Korte Suprema.

Apan, sumala sa abogado sa NCCA nga si Atty. Trixie Angeles, angay nga ang Super Star mismo ang moduso sa reklamo.

Hangtud karon, hilom gihapon ang kampo sa aktres sa di pag-ila sa iya isip National Artist bisan nanguna siya sa mga nominado.

Apan girespeto sab sa NCCA ang desisyon ni Pangulong Noynoy Aquino.

Usa sa mga milutaw nga hinungdan kung nganong wa napili si Aunor, mao ang kagustuhan sa Pangulong Aquino nga iapil sa mga nominado ang mipanaw nga Comedy King nga si Dolphy hinungdan nga padayon nagsaway ang mga celebrities ug National Artists sa Palasyo.

Say ni National Artist Bienvenido Lumbera nga angay i-eksplikar sa Malacañang kung nganong gitanggal si Nora Aunor.