SI DAVAO City Mayor Rodrigo Duterte naghatag og hingpit nga pahimangno batok sa mga tawo nga nanghasi sa pamilya sa mga suspek nga nahimong saksi sa Richard King murder case.

Ang live-in partner sa akusadong si Paul Dave Molina Labang nagpatabang sa Toril Police Station human duha ka mga armadong tawo ang miadto sa ilang balay sa Toril nagtanyag og pinansiyal nga suporta sa pamilya.

Si Duterte nagkanayon nga di siya magpanuko pagdakop ni bisan kinsa nga manghilabot sa pamilya sa mga suspek sa pagpatay ni King.

Ang mayor nanawagan ngadto sa mga tawo nga nalambigit sa kaso nga mo-atubang sa pagtuyok sa ligid sa hustisya.

Si Police Superintendent Leonardo Felonia giakusahan ni Labang nga mao ang tawo nga nagmando kanila nga patyon ang negusyanteng si Richard King niadtong Hunyo 12.

Duha ka mga akusado, Rommel dela Cerna nga nahimong lookout ug drayber sa motorsiklo nga si Rodel dela Cerna, nagtudlo usab kang Felonia.

Si Felonia nagsulti nga wa siyay labot sa hitabo apan nagtuo siya nga dunay laing tawo nga nagduot kaniya sa kasong pagpatay tungod sa selos sa trabaho.

Si Atty. Behn Joseph Tesiorna, abogdao sa tulo ka akusado, nagsulti nga moduso sila sa hangyo sa tulo ka akusado, Labang ug managsuong dela Cerna, nga ibutang sila sa witness protection program sa Department of Justice. (Ben O. Tesiorna)