TAGUM CITY -- Sa tinguha nga makahuman sa pagtungha sa kolehiyo, wa igsapayan sa 19-anyos nga estudyante nga ibaligya ang iyang pagkababaye.

Si Mary Jane (bansagon gitago sa Superbalita) nagbutyag nga ang kalisud maoy nagtukmod kaniya aron sudlon ang trabaho isip “tuition girl”.

"Lisud ang among pamuyo sa bukid sa Comval. Misamot pa dihang nabaldado si Tatay human natumbahan og kahoy sa bagyong Pablo. Si Nanay, nakahukom nga paundangon nako pag-eskwela labina nga nahurot pagkadaut ang among pananom sa bagyo," sulti ni Mary Jane.

"Apan wala ko misugot tungod kay pangandoy nako nga makahuman sa kurso nga nursing dayon maka-abroad," dugang niya.

Si Mary Jane nagsulti nga iyang ka-boardmate nga ginganlan og Sarah maoy nakakombinsi niya nga mosulod sa maong trabaho.

"Sa unang panagkaila namo ni Sarah, nagtuo gyud ko nga adunahan siya. Ulahi na nakong nahibaloan nga pareha lang diay ang among kahimtang. Apan kay madiskarte siya, mapalit niya ang gustong paliton tungod sa sekreto niyang trabaho isip tuition girl,” saysay niya.

Matud niya, tungod sa kalisud, gisulod ni Mary Jane ang trabaho ni Sarah.

"Dako ang gibayad sa akoa sa kustomer dihang nasayran nga virgin pa ko nga iyang naangkon. Nabayran gyud nako ang tuition fee sa tibuok semester.”

Dugang niya nga dili tanang higayon mo-raket ang usa ka "tuition girl" sanglit magpabayad lang sila kung maipit sa kwarta ilabina panahon sa tingbayad sa tuition sa eskwelahan.

Nasayran nga sagad nilang kontak ang mga security guards nga maoy ginaduol sa mga parokyano nga buot malipay ibabaw sa kama uban sa mga nagpait nga estudyante.

Sa pagkakaron, si Mary Jean anaa na sa katapusang tuig sa kursong nursing pinaagi sa tabang sa dakong politiko nga nahimo niyang suki nga kustomer.

Ang politiko misaad nga iyang tabangan si Mary Jane nga makahuman sa iyang kurso hangtud nga makatrabaho. (Dexter Visitacion)