NANGHINAOT si Gilas Pilipinas coach Chot Reyes nga magdasok ang mga Pinoy nga naa sa Spain sa pagsuporta sa ilang kampanya sa FIBA World Cup nga sugdan karong Agusto 30 ug mahuman sa Septiyembre 14.

Ang naglanoglanog nga abiba sa mga Pinoy sulod sa SM Mall of Asia sa Manila nakahatag og dugang kadasig sa mga sakop sa Gilas nga mokayod pa og maayo sa miaging FIBA Asia Championships niadtong Agusto sa miaging tuig.

Nakatabang kini og dako aron maangkon sa Gilas ang silver medal sa FIBA Asia nga nagpa-qualify og balik sa Pilipinas alang sa FIBA World Cup human sa dugay nang panahon.

“I thought that if we were competitive, then the crowd would tide us over and that is exactly what happened,” asoy ni Reyes sa interbyu sa www.abs-cbnnews.com

“There were a couple of games that we shouldn’t have won, but (with) the crowd, the adrenaline kicked in and allowed us to find a way to win.”

Dili man tuod pareha sa MOA nga magdasok ang mga Pinoy nga mokanta sa “Noypi” ug “Rock You” aron pagbaraw sa kontra sa Gilas, si Reyes naglaom nga daghan gihapong mga kababayan ang mosuporta kanila sa Spain.

“I’m not gonna be surprised if we’re the most well-attended team, with the most fans in Spain, just from the number of people who are going, and the number of kababayans who are in Spain, in Barcelona and elsewhere,” pasabot ni Reyes.

Sa FIBA World Cup, ang Gilas nalakip sa Bracket B kauban ang Croatia, Greece, Puerto Rico, Senegal ug Argentina, diin sakop si Manu Ginobili, pambato sa National Basketball Association (NBA) champions San Antonio Spurs.