GIHANGOP sa pangulo sa Talisay Police Station ang paghatag kaniya og dugang 16 ka mga Field Training Program (FTP) Police nga anaa karon sa siyudad.

Adunay 16 ka mga FTP Police ang gibutang sa Cebu Provincial Police Office (CPPO) sa dakbayan sa Talisay aron bansayon ang ilang katakos isip bag-ong mga sakop sa Philippine National Police (PNP).

Ang hepe sa kapulisan sa Talisay nga si P/Supt. Reycel Carmelo Dayon nidala sa 16 ka mga FTP ngadto sa buhatan ni Mayor Johnny V. de los Reyes niadtong miaging semana.

Matod ni De los Reyes nga nalipay siya sa pagdestino sa CPPO og bag-ong mga FTP sa siyudad tu­ngod kay makatabang man kini alang sa pagpatunhay sa kahusay ug kalinaw.

Gipasidan-an hinuon sa mayor ang mga FTP nga di magpabadlong ug mopahigayon lang sa ilang mga tahas nga mao ang pagpanalipod sa katawhan.

Una niini, si Konsehal Danny Caballero, chairman sa Committee on Peace and Order, nipalabang og resolusyon nga mangayog dugang 50 ka mga pulis sa CPPO ug sa Police Regional Office (PRO) 7 nga idestino sa Talisay.

Apan, si CPPO Director Noel Gillamac miingon nga wa pa siyay mahatag nga pulis sa pagkakaron.

“Pero kining paghatag sa 16 ka mga pulis bisag FTP ni sila dako na kayo nig tabang sa taga Talisaynon magpasalamat lang gihapon ta ani sa kadagkuan sa kapulisan ilabi na ni Col. Dayon,” matod ni Caballero nga nahinabi sa Sun.Star Superbalita.

Si Dayon nga nahinabi sa Sun.Star Superbalita nibutyag nga ang mga pulis iyang idestino sa investigation, traffic ug beat patrol.

Matod niya nga sa naasoyng aspeto dako silag matabang sa kapulisan sa Talisay apan di usab kini niya hagatag mga sensitibong trabaho sanglit bag-o pa ang mga pulis. Gani, tipik pa kini sa ilang training.

Nagkanayon si Dayon nga dako na kining matabang sa ilang buhatan bisan ug kini temporaryo lang tungod kay iyang giangkon nga kuwang silag mga pulis.

Ang mga pulis idestino sa Talisay sud sa unom ka buwan una mobalik sa ilang traning school.