NIMANDO ang Cebu Provincial Police Office (CPPO) sa tanang hepe sa kapulisan sa lalawigan sa Sugbo nga mohimog profiling sa mga langyaw nga naa sa ilang hurisdiksyon ilabi na sa lungsod sa Cordova.

Kini human sa pagkasikop sa usa ka Australian national nga nalambigit sa cyber pornography sa Cordova nga si Peter James Robinson.

Samtang, karong bag-o ang langyaw nga gii­ngong gireklamo sa iyang katabang didto sa dakbayan sa Lapu-Lapu nga nagpamasahe apan kalit kining nagduwa sa iyang kinatawo.

Si CPPO Director Noel Gillamac nimando sa hepe sa kapulisan sa lungsod nga mohimo og profiling sa tanang langyaw nga naa karon magpuyo sa ilang mga dapit.

Kini pinaagi sa pagkuha sa ilang background, nasyonalidad, trabaho ug unsa ang ilang tuyo sa pagbakasyon dinhi sa Sugbo.

Matod ni Supt. Ro­dolfo Albotra, hepe sa Provincial Intelligence Branch sa CPPO, nga mahimo kini sa kapulisan pinaagi sa pagpakig-alayon sa mga resort owner ug sa ilang gipuy-an nga mga apartment.

Nagkanayon si Albotra nga dunay grupo nga gitawag og Foreign National Keepers Network (FNKN) nga namugna tungod sa bagyong Yolanda nga natukod diin gilangkuban sa nagkadaiyang foreign nationals.

Ang grupo motabang sa pag-monitor sa mga nagpabadlong nilang mga sakop.

Nakig-alayon na karon ang CPPO sa naasoyng organisasyon mao nga gimanduan ang tanang hepe sa kapulisan sa kalungsuran nga moagni sa mga foreign national nga magpasakop sa pundok.

Sunod buwan gitak­da nga mopahigayon og anti-cyber pornography seminar ang kapulisan didto sa isla sa Bantayan nga maoy usa sa mga paboritong lugar nga dagsaan sa mga langyaw sa lalawigan.