MIDANGOP sa kapolisan sa Police Station 4 (PS4) sa Carmen ang usa ka tag-iya sa establisamento human mabitbit sa duha ka wala maila nga suspetsado ang iyang mga importante nga butang ug kwarta mga alas 8:00 sa buntag sa Tonic Agrivet Store, Hayes Corner Roxas St. Barangay 31, siyudad sa Cagayan de Oro.

Gisaysay sa biktima nga si Antonio Raot, 53, minyo ug residente sa 12-22 Nazareth ning siyudad, nga ang iyang hand bag nga kolor itom nga anaa sulod niadtong higayona sa iyang sakyanan nga D-Max kolor puti gibitbit sa duha ka mga suspetsado samtang naka parking kini atubangan gayud sa iyang gipanag-iyahan nga tindahan.

Nasuta nga usa ka babaye ug usa ka lalaki ang mibitbit sa iyang bag pinaagi sa Closed-circuit television (CCTV).

Sulod niadtong bag mao ang salaping cash nga mokantidad sa P140,000, cellphone nga Sony Xperia nga mobalor sa P32,000, duha ka checkbook BDO, credit card, passport, mga importanteng resibo, sama na lamang sa resibo sa iyang sakyanan, motorsiklo ug elf ug post dated nga mga check.

Gisunod na sa kapolisan ang maong panghitabo alang sa dugang pa nga imbestigasyon aron masikop ang duruha ka mga suspetsado pinaagi niadtong CCTV.