IMBESTIGADOR sa pulis ang naunay og imbestigar human nagmaoy sa kahubog ug giingong nagpabuto og armas gawas sa imnanan nga Alcology sa Barangay Camputhaw, dakbayan sa Sugbo, kagahapon sa alas 8:45 sa buntag

Si SPO1 Neri Cahimat, 50, minyo, ug taga Barangay Subangdaku, dakbayan sa Mandaue, imbestigador sa Mabolo Police Station sa siyudad sa Sugbo ubos sa Cebu City Police Office (CCPO), kasamta­ngang gibalhog sa Police Station 2.

Apan nihimakak si Cahimat sa alegasyon.

Si Chief Insp. Wildemar Tiu, hepe sa Police Station 2 sa CCPO, nagkanayon nga nakadawat siyag text message gikan sa chief security officer sa Mango Square kabahin sa alarma sa pagpabuto og armas.

Wala siya maglangan uban ang iyang mga sakop sa alert team nirespondi sila sa maong lugar sa pag-abot niini duna silay nakit-an nga pito ka mga lalaki nga nag-inom nga sakto na sa karga.

Usa niini si SPO1 Neri, kinsa wala nag-uniporme ug nitahan dayon sa iyang armas nga Super .38, ug ang uban niya sa grupo ang unom ka tawo, ang usa, usa sa mga tag-iya og imnanan, disk jockey ug mga barkada.

Walay niangkon kon si kinsa ang nagpabuto sa armas, pero nakita sa lugar nga didto ang agi sa bala nga nabangag sa yuta nga dunay daghang bonbon.

Gisuhid nila og maayo pero wala silay nakit-an nga kabhang o kaha slug.

Si SPO1 Cahimat lakip ang iyang unom ka mga kauban sa inom gidala sa Police Station 2.