DUHA ang nakabsan sa kinabuhi sa pagpamusil nga natigayon niadtong Sabado sa buntag sa Purok 4, Barangay Laligan, siyudad sa Valencia, probinsya sa Bukidnon.

Dead on the spot ang unang biktimang giilang si Joseph D. Pastrano, 42, minyo, residente sa susamang dapit, samtang gipusil na usab sa mga suspetsado si Ritchel Imolen, 30, minyo, usa ka mag-uuma residente sa maong dapit, kinsa nakaangkon og ubay-ubay ka mga samad sa nagkadaiyang parte sa lawas nga hinungdan dead on arrival sa Valencia Sanitarium Hospital.

Sa inisyal nga imbestigasyon sa Valencia City Police Office pangulohan ni Police Chief Inspector Butch Ian Miñoza, nasuta nga nadungog na lamang sa mga residente sa dapit ang kusog nga pinusila gani human nakitang nagbuy-od na ang duha ka mga biktima.

Miresponde mismo si Miñoza uban sa iyang mga sakop ug ilang na-trap ang giilang suspek nga mao si Edgar Tanggo Batoon, taga Zone 6 Bayabas, ning siyudad sa Cagayan de Oro.

Gitambagan sa kapolisan nga motahan na lamang kini kay nalibutan na sa mga personahe sa kapolisan apan kalit niining gi-om-om ang iyang armas ug gipabuto.

Gidala pa kini sa Valencia Sanitarium Hospital apan giduso sa Northern Mindanao Medical Center (NMMC) ug giubanan ni PO3 Ibrahim D. Salvacion.

Apan dihang giinterbyu kini sa security guard sa NMMC, daw nagpatuo kining polis ug nagpaila sa pangalan nga Raymund Pagtalunan apan giklaro ni Salvacion ang pagpamakak niini human nagpatuong kini ang biktima.

Samtang ang giingong usa ka kauban niining nailing si Leo Sabrano ang una na nga nadakpan sa kapolisan ug detinado na karon sa Valencia City Police Office.

Narekober usab sa crimescene ang usa ka unit sa kalibre 38 nga adunay SN 077026 ug duha ka buhing bala, motorsiklo nga MC Kawasaki Bajaj rouser, nga kolor itom ug walay plate number.

Ang kaso padayon pa nga giimbestigahan samtang suspetsado padayon pa nga giobserbahan sa mga doktor sa NMMC.