SUKOL. Si Talisay City Mayor Johnny delos Reyes (JVR) nagpakauwaw ug misupak pa gyud sa lagda sa Ombudsman bahin sa iyang mga paryente nga nagtrabaho sa gobyerno apan wa niya gitug-an sa iyang SALN.

Ang balaod, RA 6713, the Code of Conduct and Ethical Standards for Public Officials and Employees, nagmando sa opisyal sa kagamhanan sa pagdeklarar sa ilang paryente hangtod sa ikaupat nga relasyon, kadugo ba o tungod sa kaminyoon, nga nagtrabaho sa gobyerno.

Ang maong balaod wa maghatag og exemption nga tungod kay, matod pa ni Hazel Bathan, mga job order (JO) lang nga paryente ni JVR di na kinahanglan pa ideklarar sa SALN sa mayor.

“Good faith,” matod pa ni City Legal Officer Fred Sipalay, dili depensa sa pagtago ni Mayor JVR sa iyang daghan nga paryente nga nagtrabaho sa Talisay City Hall.

Gani, ang RA 6713 nagmando nga basta naa nagtrabaho sa gobyerno ang maong paryente sa opisyal sama ni Mayor JVR, bisan wa sa Talisay City Hall nagtrabaho, kinahanglan itug-an sa SALN.

Nagpasabot ba ni nga naa diay kauwaw si Mayor JVR? O, di ba nahadlok siya nga mahibaw-an sa Ombudsman nga daghan siya og paryente nga nagtrabaho sa kagamhanan sa Talisay.

Di na angayan nga mauwaw o mahadlok si Mayor JVR kay nahibaw-an na man sa publiko ang mao nga isyu. Wa nay angay itago pa sa publiko o sa Ombudsman tungod kay dugay na man ni nga nabulgar.

Naay Hazel Bathan nga nagbuot-buot og hatag sa iyang opinyon (nga di pa husto) sa probisyon sa RA 6713. Ang ensakto unta, Ms. Bathan, nangayo ka sa opinyon gikan sa Ombudsman.

Mosabot man ta sa gipada­yag ni City Legal Officer Sipalay tungod kay di man na siya tawo sa mayor. Si Sipalay hinanib ni Bise Mayor Villarante. Mao nga di ta mahibung kon ang iyang opinyon gitukmod si Mayor JVR sa kadautan.

Hapit tanan anak ni Ma­yor JVR iyang gipatrabaho sa Talisay City Hall. Basi sa taho, naay daghan paryente ang mayor nga nagtrabaho nga JO o kaswal sa city hall apan wa gideklarar sa iyang SALN.

Ang gitug-an ni Mayor JVR, nga katuohan nga iyang gipukan si Cong. Eddiegul sa miaging piliay pagka mayor, mao ra gyud ang iyang mga anak nga si John Yre, city administrator o little mayor, ug Irish May Racaza, iyang executive assistant.

Pagkadaghan na man sa kontrobersiya aning si Mayor JVR. Gawas sa bolilyaso sa mga private security guards nga iyang gihimo nga JO, nia na sad ron ning SALN nga nagbuot-buot siya sa iyang gusto og kinsay iyang itug-an. Susmaryosep!

****

AVAVI. Ang pundok sa mga Bisaya sa Melbourne, Victoria, Australia, nga usa ko kaniadto sa mga nag-organisar sa tuig 1989, lig-on ug nagkahugpong gihapon bisan pa sa giingon nga ginagmay nga diperensya.

Kuyog sa mga dagko diri sa Melbourne (Victoria), akong na-establisar ug narehistro ang pundok sa Australian Visayan Association in Victoria (Avavi) diin gipangulohan hangtud karon ni Dr. Ed Lagrito.

Ang mga haligi sa Avavi sama nila ni Dr. Lagrito, Ed Cortes, Roger del Castillo, Perci Lecin, Rey Tanjay, Atty. Garci Canda, ug ilang mga kapikas, nagpabilin sa Avavi bisan og dunay mibiya ug nagmugna og lain nga pundok. Daghan na usab ang mitaliwan nga mga dagko sa Avavi.

Niadtong Sabado, si Perci ug Vivian nangulo og barbecue sa balay sa akong ugangan, mama Doling Corbo ug iyang kauban Bill Hodge, agi’g despedida kay mibiyahe ko pagka Dominggo padung sa USA. Mitambong usab sila si Ian Danlag, Mimi Dolino, Ronnie ug Lynette del Castillo, Fe Abogadie, ug Atty. Canda.

Miduyog ang maayong panahon sa among pagbarbecue kay migitiw ang adlaw. Karon nga buwan hangtud sa Agosto tingtugnaw (winter) sa Melbourne, Australia, samtang dinhi sa ato ug sa USA ting-init.

(atty.ellieE@gmail.com)