DAGHAN ang nasagmuyo ning kalit nga pagbali sa inahan sa nakontrobersiyal nga batang bag-ong natawo kansang baba giingong gitipan sa usa ka nurse sa Cebu Puericulture Center and Maternity House Inc.
Ang inahan nga si Jasmine Badocdoc nakahukom nga dili na lang mopadayon sa iyang kaso batok sa maong hospital ug mipirma na kini og amicable settlement nga naglatid nga wa siyay gibasol sa maong insidente nga nahitabo niadtong Mayo 9, ning tuiga.
Kini sukwahi sa iyang pamahayag nga napublikar niadtong Mayo 28 diin hugot niyang giluwatan nga ila gayung pasakaan og kaso ang CPCMH human kini mamakak ug sila pay gipasanginlan.
Giingon nga adunay salapi nga nasukip sa maong settlement.
Katungod man tuod ni Jasmine kon unsay iyang hukom kalabot sa maong kaso apan sa iyang gihimo aduna siyay nataligam-an.
Milampos siya sa pagkuha sa simpatiya sa publiko sa dihang iyang gi-post sa social networking site ang hulagway sa bata nga adunay teyp ang baba.
Nakuha usab niya ang atensiyon sa mga media nga maoy mituki og maayo sa maong insidente aron mahatagan og saktong inpormasyon ang publiko.
Nakabig niya ang pipila ka mga ahensiya sa gobiyerno nga mipatuman na gyud unta sa sistema aron siya matabangan. Apan taliwala ning tanan yano ra kini niyang gitalikdan.
Sa laktod nga pagkasulti, iya usab nga gitak-opan ang pagpangita og hustisya alang unta sa iyang kaugalingong anak.
Ang hustisya nga maghatag usab unta og paglaom niadtong uban pang nangabiktima. Ug labaw sa tanan hustisya nga magleksiyon niadtong mga malapason sa katungod sa mga bata.