DEAR Noy Kulas,
Tagoa lang ko sa ngan nga Jesel, 24 anyos ug nagtrabaho isip executive diri sa abroad.
Di unta ko ganahan mo-abroad pero gikinahanglan aron makatabang ko sa akong pamilya kay ako ang kinamaguwangan. Naa pa koy gipaeskwelahang mga manghod.
Sud sa duha ka tuig nako kapin nga pagtrabaho diri, naa na koy daghang friends. Naa koy daghang suitors pero wa nako pangsugta kay ang akoa diri work and work. Hasulan ko nga dunay uyab kay naa nay magbuot sa akong oras. Di ko gusto nga magapos sa usa ka relationship. Ganahan kong motutok ra sa trabaho ug kon gikinahanglang mo-overtime, makahimo ko kay wa koy hunahunaon.
Tungod tingali sa akong kakugi, dunay nakabantay nga usa sa mga department manager.
Nagkasuod ming duha kay siya mao sab, grabe sa iyang work. Foreigner ni siya. Ulitawo siya apan dunay uyab nga pareho niya og nationality.
Sa nagkadugay, nisulti siya nako nga love ko niya. Na-shock ko kay wa ko mag-expect nga mosangko sa pagka develop sa iyang feeling ang among panagsuod. Karon naglibog na ko unsay akong buhaton kay ang iyang uyab naa ra sab sa laing building nagtrabaho.
Suod silang duha kay Makita nako sa ilang mga lihok. Apan moangkon ko nga sa tanang nanguyab nako, diha ra ko ganahi niya.
Please tambagi ko, Noy, kay naglibog ko unsay akong buhaton.
JESEL
Jes,
Okay ra unta kay pulos mo single og status. Ang nakaapan kay naa na siyay uyab. Okay ra usab unta kon nagkabuwag sila unya nanguyab siya nimo. Apan wa man gud. Maayo ang dagan sa ilang relasyon unya lain paminawon nga ikaw ang mamahimong wrecker kon imo siyang sugton ug maguba ang ilang relasyon. Sahi ra sab kon ikaw ang buhatan sa ingon niana.
Pasabta siya nga kinahanglang loyal siya sa iyang relasyon tungod kay buotan man usab kaha ang babaye kaniya. Ingna siya nga mas makaayo ninyong duha nga magpabilin nga managhigala. Apan kon uncomfortable ka, nga sagad maoy mahitabo basta duna nay deeper feeling nga ma involve sa panaghigalaay, modistansya ka kaniya. Pinaagi usab niini, di ka madala sa tentasyon kay kanang tawhana di na mohunong sa iyang pagpanguyab nimo hangtod nga iya kang mapasugot.
Ayaw sab patya ang imong lawas sa trabaho. Mas makaayo nimo ang maglingawlingaw aron di ka laayan. Pag-control lang sa expenses kon mosuroy o mag shopping ka. Pinaagi usab niini makalimtan nimo ang imong gitagoang pagbati niya. Posible pa gani nga ikahibagat mo ang tawo nga way kabilinggan nga mopapitik sa imong kasingkasing.
NOY KULAS
Alang sa imong problema, e-mail sa kulassuper@sunstar.com.ph