KLASE sa estraktura ang basehanan sa pagbana-bana sa danyos sa sunog.
Matod pa ni SF03 Roylin Maratas sa Cebu City Fire Department nga ang estraktura ang nag-una nilang basehan sa pagsukod sa danyos.
“Ang fire investigator ug city marshall ang mobanabana sa kantidad sa danyos kay sila man ang naa sa lugar nga nahitabuan,” pasabot ni Maratas sa interbyu sa Sun.Star Superbalita.
Dugang usab ni SF02 Daniel Relatado nga ang kantidad sa butang mokunhod sa paglabay sa panahon.
“Pananglitan ang balay nikantidad og P1 milyon sa pagtukod ten years ago. Karon mo-depreciate jud siya. Di pareho sa yuta ba nga permanente,” pasabot ni Relatado
Ingon pa sab ni Maratas nga ang aktuwal nga balor sa proyedad lahi sa ilang pagkarkulo kay ang ilang pagatan-awon mao lang ang estraktura.
“Kanang gipasabot man gud nila nga cost kay apil man ana ang labor cost. Ang mga appliances nga ilang napundar ug ang yuta, unya ang amo kay ang structure ra jud,” dugang ni Maratas.
Siya niingon nga modepende usab ang ilang pagbanabana sa danyos kon gama ba kini sa light o concrete nga materyales.
Di na sab sakop labot nila ang pagsukod sa danyos sa mga propyedad nga insured.
“Kami sa imbestigasyon kay basin aduna’y foul play nga nahitabo ba. Ang amo lang kay ang paghatag og certification nga naa’y nasunog. Naa man na sad sila’y adjuster (insurance company) nga murag imbestigador, nga mao’y motan-aw sa balor sa nasunog.
Sila ang kapares sa nasunogan ug sa insurance company,” dugang ni Maratas.
Daghan ang mga reklamo nga managlahi ang bana-bana sa danyos sa mga bombero ug sa mga nasunogan. Nick Angelie T. Ronquillo, USJ-R MassCom Intern