DEAR Noy Tikyo,

Tawga lang ko og Tina, 25, dalaga pero naa nay anak. Tungod sa nag-uros-uros kong gugma sa akong boyfriend kaniadto, mimabdos ko og sayong nahimong inahan nga way bana.

Wala na mi magkita sa amahan sa akong anak kay kalit man lang siyang namiya nako. Sukad niadto, naningkamot na lang ko og ako aron buhion ang akong anak.

Ang bata tua karon sa akong inahan sa probinsiya sa Davao del Norte. Nagapadala na lang ko og pangunsomo sa bata sa gamay kong suweldo diri sa siyudad sa Davao.

Bisan unsa na lang nga trabaho ang akong sudlan aron lang nga mabuhi ug makasuporta nila kay wala man koy permanenteng trabaho diri. Busa bisan tindera akong sudlan basta mokita lang ko.

Di na unta ko gustong mahigugma pa ug motutok na lang sa akong pagpanarbaho apan lisud diay. Kay di malikayan nga daghan ko og makailang mga lalaki unya pipila kanila manguyab nako.

Pero sa dihang ilang mahibaw-an nga duna koy anak, mokalit lang og sibog ug di na magpakita nako.

Naa pa kahay mahigugma nako bisan sa akong kahimtang karon? Palihug tambagi ko.

Tina

*****

Tina,

Dako gihapon ang purohan nga maminyo ka kay di ka pa man kasado. Dalaga ka pa man gihapon bisan sa imong kahimtang karon.

Basta positibo ka lang sa imong kaugalingon, moabot gihapon ang saktong panahon nga makaplagan nimo ang tinuod nga lalaki para sa imong kasingkasing.

Kanang mga lalaki nga nanguyab nimo unya mabugnaw kon masayran nga pinaangkan ka, mao na sila ang mga lalaki nga di tinud-anay ang pagbati nimo.

Kay ang tawo nga tinuod nga mahigugma, di maglantaw kon unsa ang imong kagahapon. Kon tinuod siyang mahigugma nimo, dawaton ka niya bisan kinsa ka pa. Sa iyang pagdawat nimo, iya sab nga dawaton ang imong anak nga nahimong kabahin sa imong kagahapon.

Tinuod duna ka nay anak, apan wala ni magpasabot nga di ka na angay nga higugmaon ug pakaslan. Moabot ra ang panahon nga ang imong damgo ug tinguha maangkon ra ilabi kon positibo ka sa imong panglantaw sa kinabuhi.

Ayaw ipagamay ang imong kaugalingon ngadto sa ubang babaye kay di man mo managsama sa usag-usa. Lahi mo og mga kasinatian. Busa ayaw ikompara ang imong kaugalingon nila kay moubos ang imong pagtan-aw sa imong pagkatawo.

Ayaw kawala og paglaum. Moabot ra ang saktong panahon nga makakaplag ka ra og lalaki nga imong higugmaon ug mahigugma sab kanimo.

Ang ako lang ipahimangno nimo nga ayaw lang og dali-dali sa imong mga desisyon sa kinabuhi. Himoang leksiyon ang nahitabo sa imong kinabuhi.

Ayaw palabi sa imong pagbati. Kay sa giingon na sa kanta "to much love will kill you."

Di sayop ang mahigugma. Kay bisan kinsang tawo mobati man gyud og gugma. Apan di lang magpalabi, ilabi gyud to the point nga itugyan na ang kaugalingon ngadto sa hinigugma. Bata ka pa ug daghan pang oportunidad nga moabot kanimo.

Noy Tikyo