MAY mga pulong Bisinaya nga talagsa ra natong madunggan. Sama sa "alimyon" nga mabasa ra nato sa karaang basahon sama sa Bisaya, Banawag ug Bibliyang Binisaya.
Ang magasin ug komiks ray among mabasa sa bata pa kami kay wala may TV. Mabasa didto ang mga sugilanon sa kinabuhi, ang istorya ni Uray Angkay ug uban pa.
Ang mga bag-ong tubo wa na makabati niini gawas kung mobasa sila sa Super-B nga hanas mopasibaw ug mogaray sa pinulungang ato sa Visayas ug Mindanao.
Wa nako gamita ang pulong nga "baho" nga moalisngaw sa politika kay mao kini ang atong kanunay'ng madunggan ug nagpasabot kini sa negatibong hulagway sa politika.
Busa aron positibo ang dating, gitawag ko kini og "alimyon" sa politika.
Bisan medyo layo pa ang eleksiyon sa 2016, maalimyonan na nato ang arangkada sa pinakataas - ang sumusunod ni PNoy. Atong mabantayan nga hinayhinay nang gibalian sa pako ang oposisyon.
Kung sakto ang akong panglantaw, si Vice President Jejomar Binay ang standard bearer sa UNA, kauban nila ni Manila Mayor Erap Estrada, Senador Jinggoy Ejercito Estrada nga nataral karon sa kasong plunder o paglabatiba sa iyang PDAF nga kuwarta sa katawhan.
Kahinumdoman nga gibaligya ni Binay ang Makati diin siya nahimong Mayor aron makakuha'g dakong boto sa niaging piniliay.
Ang laing modaganay sa pinakataas nga puwesto mao si Sen. Alan Peter Cayetano nga kanunay diri sa Davao aron manghatag og livelihood assistance sa mga kooperatiba.
Sama kang Binay, iya sab nga gibaligya ang Taguig City diin nahimo siyang Mayor ug kongresista, kung wa ko masayop. Apil sab sa sultada si Sen. Bong Revilla nga sama ni Estrada, nataral usab sa kasong plunder kauban ni Sen. Enrile nga "may asim pa si tanda" ingon pa sa iyang mortal nga kaaway'ng babaye sa Senado.
Ang hinayhinay nga pagbali sa pako sa oposisyon mao ang taktika sa administrasyon aron mosutoy ang ilang manok ug suod nga higala ni PNoy nga si DILG Sec. Mar Roxas.
Sa nahitabo pa lang sa Zamboanga siege, gipakaulawan na sa administrasyon si Binay nga nagbuotbuot daw og hinabi sa mga rebelde.
Hasta ang mga gibuhat sa oposisyon sa pagtabang sa biktima sa Bagyong Pablo ug Yolanda ginababagan sa administrasyon. Apan daghan sab og palpak ang administrasyon ilabi na sa pagtubag nila sa problema sa Yolanda nga klarong adunay alimyon sa politika.
Kung dunay buhatong publicity mileage ang oposisyon, tugbangan kini og duha o tulo sa administrasyon.
Ang PDAF scandal gihimo sab nga instrumento sa pagkulata-patay sa oposisyon.
Ang pambansang kamao Manny Pacquiao sa Sarangani Province gikulata sab sa iyang buhis nga wa daw mabayri kay suod siya ni Binay ug posibleng mahimong iyang running mate karong 2016 kung di puwede si Jinggoy.
Bahad pod ni Erap nga di magbinuang si Binay sa ilang kasabutan nga si Jinggoy ang iyang ka-tandem kay kaya niyang mokalas sa UNA ug motukod og DOS (disperadong oposisyon ng sambayanan).
Busa di kita matingala kung magsige na'g pakita si Roxas sa mga lokal nga isyu sama sa hadla sa terorismo sa Mindanao kay alimyon kini sa politika.