ANAA sa heightened alert status ang kapulisan ug kasundalohan aron mapabiling luwas ang katawhan.

Kini ang gibutyag ni Davao City Mayor Rodrigo Duterte human nakigtagbo si Department of Interior and Local Government (DILG) Secretary Mar Roxas.

Gimandoan dayon ni Duterte ang kapulisan ug kasundalohan nga bantayan ug rekisahon gyod pag-ayo ang mga sakyanan pasulod ug pagawas sa siyudad.

Ang hugtanong implementasyon gipatuman subay sa mando sa mayor human kini nakadawat og intelligence report gikan kang Pangulong Benigno Aquino III nga dunay hulga sa seguridad nga target ang siyudad ug pipila ka lungsod sa Mindanao.

Sa impormasyon gikan sa Davao City Police Office (DCPO), gipakusgan sab ang intelligence monitoring aron di makasulod ang dautang elemento.

Wala na gikompirma sa mayor kung unsang grupo ang posibleng mo-atake sa siyudad, apan dunay panglantaw ang AFP ug PNP nga kung ugaling dunay mahitabo, posible kining miyembro sa Jemaah Islamiyah, usa ka Asian terror group nga naglihok sa habagatang sidlakan sa kalibutan nga maoy posibleng mihimo sa pangatake niadtong tuig 2002 sa Bali bombings nga mikonektar sa Al Qaeda nga mipatay og daghang sibilyan.

Pamolitika?

Giingong sa pipila ka Dabawenyo nga pamolitika ang pagkatag sa istoryang dunay hulga sa terorista ang siyudad.

Si Lorena Magbanua-Salcedo, usa ka negusyante sa Bankerohan Public Market, nagsulti nga ugaling pamolitika lamang ang maong istorya.

"Sa akong tan-aw, mora'g pamolitika man ni, kay kani bitaw si Roxas puwerte gyud ni magpapili pagka-presidente, pero way kumo sa paglikay," sulti sa negusyante sa pakighinabi sa Superbalita kagahapon.

Sa lahing pakighinabi, gisulti sab ni Syner John O. Primero nga taga Barangay 22-C, Boulevard nga daw sa pasumangil ang maong impormasyon tungod sagad sa mga politiko nga magpapili, magpaila ug mohimo kini'g dakong papel sa komunidad nga makabilib ang tawo kaniya.

"Gawas sa atong mayor, kay tunay man gyud na, pero kining Mar Roxas, naa pa'y Binay ug kinsa pa nang naa sa ilang likod, tataw ug halata kaayo ilang partisipasyon," sulti niya. (Jeepy P. Compio)