KORONADAL CITY -- Duha na ang patay ug 250 ang naospital sa cholera outbreak nga nagsugod niadtong Biyernes didto sa Barangay Ned, Lake Sebu, South Cotabato.
Basi sa taho gikan Municipal Disaster Risk Reduction and Management Council (MDRRMC) nga giigo sa cholera outbreak ang unom ka Sitio sa Barangay Ned, Lake Sebu.
Ang mga biktima gipangdala sa Barangay Health Center ug Lake Sebu District Hospital.
Kadaghanan sa mga biktima nagagikan sa Sitio Kibang, Lubo, Tinugas, Proper, Blit ug Tasufaw.
Sumala pa nga kontaminado nga tubig nga giinom sa mga biktima gikan sa balon ug spring sa maong dapit.
Abtik sab nga nang-apud-apod og hinabang ang Municipal Government ug si South Cotabato Governor Daisy Avance Fuentes sa mga biktima sa cholera outbreak.
Gipailawom sab sa rehabilitasyon ang kanal, balon ug spring nga gikuhaan og tubig mainom sa mga molupyo nga posibleng nagka-kontaminar sa hugaw nga tubig gumikan sa grabeng pag-ulan.
Nahiabot na sab ang Special Team sa Department of Health-Soccsksargen nga mag-imbestiga sa cholera outbreak. (Edgar Fuerzas)