PATAY ang usa ka lalaki human nabanggaan ang gimanehong motorsiklo sa usa ka Fuso Truck nga adunay karga nga mga buhing manok mga alas 5:00 sa kaadlawon niadtong Lunes sa Barangay Bugo ning siyudad sa Cagayan de Oro.
Naila ang biktima nga si Ramonito Cañete, 29, residente sa Lantapan, Bukidnon nga nagmaneho sa motorsiklo nga Honda Wave ug nagdala sa plaka nga 7780KW.
Gisaysay ni Senior Police Officer 3 Armando Agravante sa Police Station 6 (PS6) sa Puerto sa interbyu sa radio nga dead on the spot ang biktima atol sa insidente.
Sa inisyal nga imbestigasyon, nasuta nga nakabangga kining maong suspetsado sa nahisgutang motorsiklo nga gimaneho ni Cañete apan mipadayon kini sa Baranggay Bugo dapit sa Del Monte Philippines (DMPI) ug nakabangga na usab ug laing sakyanan nga Wagon Prado.
Matud pa sa nakakita sa maong panghitabo nga nagbaklay kining drayber ug gibiyaan ang iyang gimanehong sakyanan samtang ang iyang pahinante usab nga mibiya sa mga kargang mga buhi nga manok ug nagbaklay ngadto sa may Puerto dayon sakay sa trisikad.
Ang sakyanan kasamtangang anaa sa kapulisan sa Police Station 6 sa Puerto ug ang mga karga niini gipadala na ngadto sa lain nga biyahedor.
Sa pagkakaron anaa na sa Everlasting Funeral Homes ang patay nga lawas ni Cañete ug gawasnon pa ang maong mga suspetsado kinsa daling misibat human sa maong panghitabo.