GIAWHAG sa City Social Welfare and Development (CSWD) ang Department of Education nga ipaapil sa pagtudlo sa mga kabataan ang mga curfew ordinance nga bag-o lang gipatuman sa siyudad sa Cagayan de Oro.
Kini ang hangyo ni CSWD office in charge Teddy Sabugaa ngadto kang Dr. Elena Borcillo, kinsa city school division superintendent.
Gibutyag ni Sabugaa nga bout niyang maapil sa curriculum aron matudlo kini sa mga maestra sulod sa tunghaan ang kalabot sa gipatuman nga curfew ordinance sa siyudad ug ma-edukar ang mga kabataan labina sagad sa mga minor de edad nagtungha pa sa high school ug elementarya.
Hinuon gibutyag ni Borcillo nga ila pa kining hisgotan tungod kay maayo man usab ang tumong sa maong ordinansa ug makabalo ang mga kabataan kung asa na lamang sila kutob diha sa kadalanan panahon sa kagabhion.
Kahinumduman, gipatuman sa siyudad ang curfew batok sa mga batan-on nga nag-edad og 15 paubos ug gidili na sila sa paglatawgaw gikan sa alas 10:00 sa gabii paingon sa alas 5:00 sa kadlawon sa bisan asang palibot sa siyudad labina sa mga publikong lugar sama sa parke, bar, bilyaran, mga ktv bars, ug uban pa nga lugar nga gidili kanila.
Kahinumduman, ang batan-on nga madakpan multahan ang mga ginikanan gikan sa P500 ngadto sa P1500 aron paglukat kanila. Hinuon sa kasamtangan wala pay natala nga nadakpan. (SVB)