PULIS nga gibilanggo tungod sa pagpabuto sa iyang armas mihimakak sa pasangil.
Si PO3 Neri Cahimat giingong nagpabuto sa iyang armas samtang nag-inom sa may Mango Square uban sa iyang mga higala hinungdan nga gidakop ni chief Insp. Weldimar Tiu, hepe sa Fuente police, kinsa nitubag sa alarma.
Matod ni Cahimat nga way nahitabong pagpabuto sa armas.
Natingala siya nga kalit lang naabot ang grupo ni Tiu ug mitumbok dayon niya nga nagpabuto sa armas.
Apan niinsister si Tiu nga si Cahimat gitudlo sa usa ka guwardya sa Mango Square nga nagpabuto sa armas ug daghan ang nakadungog niini.
Kasong alarm and scandal ug indiscriminate firing ang ipasaka sa kapulisan samtang kalapasan sa National Police Commission (Napolcom) memorandom circular ang atubangong kaso sa pulis.
Gipaubos usab sa ballistic exam ang armas ni Cahimat pagtino kon nakapabuto ba kini samtang nagpaubos sa paraffin test ang maong pulis.
Mohimo usab og imbestigasyon ang Investigation and Detective Management Branch sa CCPO alang sa kasong administratiba nga ipasaka batok sa mao nga pulis.