MGA pulis nga nag-atubang og kasong administratiba ingon man kadtong nasobraan na kadagko ipailawom sa subling pagbansay-banay sugod karong adlawa.

Ang ipailawom re-training sa mga pulis sa dakbayan sa magagikan sa tanang police stations sa Cebu City Police Office.

Ilakip na kadtong gipaubos pa sa imbestigasyon  labot sa giingong pagpanalipod sa  illegal drugs ug  kadtong mga pulis nga sobra na ka dagko ang ilang lawas.

Matod ni Sr. Supt. Noli Romana, hepe sa Cebu City Police Office, nga ang tumong ug tuyo sa re-training aron mahasubay og balik sa tarong nga dalan ang maong mga pulis.

Apan giklaro ni Romana nga ang pagpaubos sa re-training sa maong mga pulis wa magpasabot nga mawagtang na ang ilang mga kaso nga giatubang.

Iyang gimandoan ang IDMB sa CCPO nga ipada­yon ang pagkuha og mga impormasyon sa mga kasong ilang gikalambigitan.

Matag police station dunay tulo ngadto sa lima ka personnel ang ipaubos sa seminar.

Samtang sa Talamban Police Station, adunay pito ka mga pulis nga giparelibuhan sugod kagahapong adlawa.

Nigawas ang report nga adunay mga pulis nga giingong protector sa ginadiling drugas sa Barangay Pulangbato, nga gianggaan og “Little Pasil.”

Hinuon walay mibarug nga bisan usa ka tawo nga mosaksi labot sa maong pamasangil nga gipadangat sa mga opisyal sa mga barangay.

Sa usa ka meeting sa barangay officials sa pipila ka mga barangay sa norte, 22 ka mga pulis ang giakusahan sa mga opisyal nga mga drug protector.

Si Sr. Insp. Bienvenido Miral, hepe sa Talamban police station, nihagit sa mga opisyal sa pagpasaka og kaso sa iyang mga sakop.

Iyang giangkon nga duna siyay nadunggan nga mga estoryang di maayo kalabot sa iyang mga sakop, apan upat lang kini ka buok.

Ang Pulangbato nga usa ka bukirang dapit sa dakbayan sa Sugbo nga naghitak ang drugas ug gipahigayunan na og dakong operasyon sa CCPO kaniadto.