GIPAKAGING sa Netherlands ang Mexico, 2-1, aron pag-abante sa quarter-finals sa World Cup kagahapon sa Fortaleza, Brazil.
Ang substitute player nga si Klaas-Jan Hentelaar maoy nahimong bayani sa kadaugan dihang nakatabang siya nga maka-goal ang Netherlands ug nakapasulod og penalty kick sa hinapos nga bahin.
Ang Mexicans naglabaw, 1-0, sa nahabiling 2:00 minutos ug daw paingon na untang makasulod sa quarter-finals sa labing unang higayon gikan niadtong 1986.
Si Huntelaar mipatid sa bola sa may kilid nga bahin paingon ngadto kang midfielder Wesley Sneijder, kinsa maoy mitabla sa duwa.
Human niini, napasulod ni Huntelaar ang iyang nakapadaog nga penalty kick.
“The tension was unbelievable, I’ve never lived through anything like that,” asoy ni Netherlands defender Daley Blind.
“We showed a lot of character in coming back. We couldn’t find our men with our passes in the first half, we struggled to get to the ball, but we came back stronger in the second.”
Sa quarter-finals, ang Netherlands makigbatok sa Greece o Costa Rica.
Lain kining sakit nga kasinatian alang sa Mexico, nga kanunayng makasulod sa last 16 gikan pa niadtong 1994 apan kanunay lang sab mapakyas pag-abante.
Katapusang nakasulod sa quarter-finals ang Mexico niadto pang 1986 diin sila maoy host niadtong higayuna. (Reuters)