TAN-AWA ra gud ning Air 21 Express.

Human nila gibaligya ang ilang franchise sa PBA ngadto sa Metro Pacific Investment Corp. ni communication mogul Manny V. Pangilinan, nagtinguha na sab kuno kining mo-apply og balik sa PBA ug andam nga mobayad sa franchise fee nga P100,000 million.

Sa ato, ang pagbaligya sa Express sa ilang franchise wa magpasabot nga losing sila sa PBA kay mo-apply na man sab og balik.

Ang naklaro lang dinhi nga dako sila og naginansiya sa ilang pagbaligya, kay tiaw mo bay (kon tinuod man gani ni) gipalit diay kuno og P280 million ang ilang franchise sa MPIC nga maoy tag-iya sa NLEX.

So, kon mobalik sila sa PBA unya og mobayad sila og P100 million, nakaginansiya na sila og P180 million sa usa lang ka pamilok.

Wa man tuoy teknikal nga aspeto nga makababag sa Air 21, pero porbida ug mao ni magdaghan, paminaw nako mao na unya ni higayon nga mahimong negusyo sa buy-and-sell ang PBA.

Mawala ang integridad niini kay ma defeated na man unya ang purpose nga mao ang pagdevelop sa basketball sa nasod kay mopatigbabaw na man ang buy-and-sell nga negusyo.

Maayo siguro pabakasyonon lang una ang Air 21 og hataas nga katuigan una pa makabalik o kaha magbutang og balaod ang PBA nga kon kinsa tong mogawas sa maong lega dili siya makadali-dali og balik.

Total, ug ang chairman pa sa PBA Board nga si Raymond Segismundo pasultion, daghan pa man diay ang mga kompaniya nga gustong mosulod sa PBA.

Ako man guy gisayangan sa Air21 kay nihinayhinay na unta og kalig-on unya kalit lang gibaligya abi kay momahal na man ang kantidad niini.

Kiwaw paminawon sa publiko ug mahimong kataw-anan kon tugotan sa board kining plano sa Express. Kinsa pa may ganahan mo-coach og team nga kon mapalig-on na ibaligya dayon.

Sama aning nahitabo karon ni Franz Pumaren nga siya intawon ang naninguha nga mahimong championship caliber ang Express.

Unya karon, sa kalit lang, mawad-an siya og trabaho kay ilisan na man sab siya kay duna may laing coach nga gitagana ang bag-ong tag-iya.

Negusyo man tuod ning PBA pero di sab siguro sa ingon ana nga approach. Magbaton lang unta og delikadisa o kaikog nga maprotehian ang kridibilidad sa lega.

********

Kusog karon ang panawagan didto sa Kaulohan nga ilisan ang coaching staff sa San Miguel Beer. Kini tungod kay bisan pa man sa kalig-on sa pisa sa maong team di man gihapon kaabot sa finals.

Halos sa kada conference na lang magsigi ni og ilis-ilis og coach ug ingon man mga players. Abi ninyo og kinsa ang gusto sa mga fans?

Papilian ning tulo nga sila si Franz Pumaren, Luigi Trillo ug Gee Abanilla. Si Franz Pumaren maoy kusog kaayong giindorso kay diha man sab ni siya sa Beermen kaniadto magduwa.

Pero, matod pa sa tinubdan, nga aduna lang ni problema si Pumaren sa bag-ong management karon. Hinuon gamay ra hinuon ning problemaha ug posibling mahilot ra ni.

Kabahin sa Barangay Ginebra, coach Jeffrey Cariaso has to prove yet kay sama kaniadto wa man gihapon makaabot sa finals ang team ubos sa iyang pagdumala. Hinuon bag-o pa sab kaayo hukman si Cariaso. (junmigs0622@yahoo.com)