NAGDAKO si Dwyane Wade nga nag-idolo sa usa sa labing maayong magduduwa sa kalibutan, ang gitawag og ‘His Airness’ nga si Michael Jordan. Matod pa niya nga iyang gisunod ang mga lihok ni Jordan sulod sa rectangle nga korte gikan pa sa iyang pagkabata. Apan niadtong panahuna, layo pa kaayo sa tinuod nga iyang masunod ang linihukan sa labing sikat nga magduduwa sa Chicago Bulls sa dekada 80 ug 90. Dili pa niya masunod kay niadtong panahuna, mubo pa ang iyang tiil, mubo pa ang iyang layat kay mubo pa man sab ang iyang gitas-on.
Taliwala sa dili maayong relasyon sa iyang pamilya, si Wade inanay nga nagkat-on og basketball gumikan kay grabe ang iyang pag-idolo kang Jordan. Sa linghod niyang pangidaron, nagbuwag ang iyang mga ginikanan nga sila si Dwyane Wade Sr. ug Jolinda. Natawo sa Chicago, Illinois niadtong Jan. 17, 1982, si Wade nagdako sa kiliran sa iyang amahan ug sa bag-ong gikapuyo niini.
Nahimo siyang high school varsity sa Harold L. Richards High School sa Oak Lawn apan sa premiro niyang tuig, gamay ra siya’g playing time. Ang iyang stepbrother nga si Demetris McDaniel maoy labing sinaligan sa team. Wala gamita si Wade kay alanganin ang iyang gitas-on niadtong panahuna.
Pagpatong niya sa 3rd year, paspas na ang pagtubo ni Wade ug inanay na siyang nakakuha og saktong playing time. Kon naa siya sulod sa korte, ipagawas niya ang tanan niyang mahimo hangtod nga nakuha niya ang pagsalig sa ilang coach. Niabot ang panahon nga usa na siya sa mga sinaligan sa team ug nag-average na siya’g 20.7 puntos ug 7.6 rebounds. Pag-abot niya sa 4th year, siya na ang labing sinaligan sa ilang tunghaan.
College career
Nakasinati og academic problems si Wade hinungdan nga tulo ra ka mga tunghaan ang nagtinguha nga mokuha kaniya sa kolehiyo. Kini mao ang Marquette University, Illinois State, ug DePaul University. Nakadesisyon si Wade nga moduwa sa Marquette University Golden Eagles sa Milwaukee, Wisconsin. Sa premiro niyang tuig, wala pa makaduwa si Wade tungod sa academic problem. Naninguha si Wade nga masulbad ang iyang problema sa academic. Sa ikaduhang tuig, natugtan na siyang makaduwa ug naghimo dayon siya’g kisaw. Nakahakot og daghang awards si Wade ug humot na ang iyang pangalan alang sa mas dako nga liga - ang National Basketball Association (NBA).
NBA rookie year
Niadtong tuig 2003 nagpa-draft si Wade sa NBA ug nakuha siya sa Miami Heat isip no.5 overall pick. Nahimo dayon siyang sinaligan sa Heat nga niadtong panahuna linghod pa isip usa ka team. Si Wade usa sa upat ka mga magduduwa sa Marquette University nga nakuha sa 1st round sa draft. Sa kasaysayan sa MU, si Wade maoy labing taas og puwesto sa NBA rookie draft. Sa premiro niyang tuig, naagak ni Wade ang Heat sa Eastern Conference semi-finals apan gitaktak sila sa Indiana Pacers.
Wala man tuod nakalahos sa national finals ang Heat apan sa kinatibuk-an, malampuson ang kampanya ni Wade sa premiro niyang tuig. Hinuon ang iyang performance natabunan sa gipakita sa sama niyang rookies nga sila si Carmelo Anthony ug LeBron James.
Pagkasunod tuig, nabalhin ang higanteng si Shaquille O’Neal sa Heat gikan sa Los Angeles Lakers. Ning higayuna, naporma ang gikahadlukang panagpares nila ni Wade. Ang Heat gikonsiderar nang usa sa labing gikahadlukan. Sa NBA 2005-06 season, naagak nila ni Wade ug O’Neal ang Heat sa labing unang NBA title niini.
Nabungkag man tuod ang panagpares nila ni Wade ug O’Neal apan nahimugso ang Big Three sa Heat dihang ning-abot sa ilang tugkaran sila si James gikan sa Cleveland Cavaliers ug Chris Bosh gikan sa Toronto Raptors.
Ang trayanggulo nila ni Wade, James, ug Bosh nakahatag na’g duha ka mga kampiyunato sa Heat sa kasamtangan ug gilaumang magpadayon pa ang ihap.
Giangkon ni Wade nga nagsunod siya sa lihok ni Jordan apan sa pagtuyok sa panahon, iyang napakita ug napamatud-an nga aduna siya’y kaugalingong lihok nga seguradong maghimo sab og marka sa kasaysayan sa NBA sama sa gibilin sa iyang idolo.
Mga pasidungog:
3× NBA champion: 2006, 2012, 2013
NBA Finals MVP: 2006
NBA scoring champion: 2009 (30.2 ppg)
NBA All-Star Game MVP: 2010 (28 points, 6 assists, 11 rebounds, and 5 steals)
10× NBA All-Star: 2005, 2006, 2007, 2008, 2009, 2010, 2011, 2012, 2013, 2014
8× All-NBA:
First Team: 2009, 2010
Second Team: 2005, 2006, 2011
Third Team: 2007, 2012, 2013
3× All-Defense:
Second Team: 2005, 2009, 2010
NBA All-Rookie First Team: 2004
NBA All-Star Skills Challenge champion: 2006, 2007
Gold medal with Team USA: 2008 Summer Olympic Games
Bronze medal with Team USA: 2004 Summer Olympic Games
Bronze medal with Team USA: 2006 FIBA World Championship
Miami Heat all-time leading scorer
Miami Heat all-time assists leader
2005 Best Breakthrough Athlete ESPY Award
2006 Best NBA Player ESPY Award
2006 Sports Illustrated Sportsman of the Year
2006 Sporting News Sportsman of the Year
r(Namantala sa SuperBalita Cebu print edition miadtong Mayo 26, 2014)