LALISONON pa gyod kon ang labing gamhanan sa nasod angay ba gyod sa atong pagtahod.
Pila na ka mga presidente ang gapabuyag, gapatuali sa atong pagtuo nga sila halangdon ug maayong sundon isip ehemplo sa pagtinarong. Mao bitaw nga di nalang ta mahibulong kon nganong nikatap ug nagkalawom sa atong katilingban kanang giingon nga “culture of corruption.”
Kon unsa’y hinanggaw sa taas, sus, magpaiwit ba pod ang naa sa ubos? Hagbay ra baya ta kabalo nga kaugalingong katagbawan ra’y dayag gipalabi sa mga gapaila nga duna’y katakos nga sarang natong kasaligan. Mao bitaw ni hinungdan nganong galunang gihapon sa kakabos ang kinabag-an sa atong kaigsoonan samtang gabinaboy ang kasagaran sa mga politiko nga gipangtuboy nato sa pangatungdanan.
Alang sa nasod nga tungasonon pa kaayo ang gilay-on sa kauswagan, nisaad si Presidente Aquino nga siya’y mag-una pagtadlas sa gitawag niyang “daang matuwid” kun dalan nga tul-id. Apan hastang haplaa sa iyang giyawit samtang nangalisbo karon ang iyang pamunoan mahitungod sa Disbursement Acceleration Program (DAP)—nga susama ra’g baho sa binilyon nga gigahin isip pork barrel nga sagad gapadako ra sa tiyan sa mga politiko.
Gapabuyag lang gyod ni, sigon pa sa nahukman sa Supreme Court. “Betrayal of public trust” kun pagbudhi sa atong pagsalig kining DAP nga gipasiugdahan ni Aquino. Nan, naa ba’y katungod ang usa ka buloyagon nga magbuot-buot kon kinsa’y angayan nga sumbanan sa pagkamaayo?
Patuyang lang! Daghang nakasaway ni Aquino taliwala sa kasamok sukad gihilabtan niya ang pagpili kang Nora Aunor isip National Artist.
Gisalikway ni Aquino ang kamaayo ni Aunor nga nipasar sa kuti nga paghashas subay sa lagda sa duha ka ahensya sa kagamhanan ni Aquino, lakip na ang pagmatuod sa honor’s committee diha mismo sa Office of the President kabahin sa katakos ni Aunor. Wa’y nada, matod pa ni Aquino kay kuno nalambigit si Aunor sa kaso nga paghupot og ginadiling druga sa Amerika kaniadto.
Gihimakak sa abogado ni Aunor ang pasangil ni Aquino kay tuod wala’y criminal record si Aunor sa Amerika. Apan padayon gihapon si Aquino sa pagwatas-watas sa kadungganan ni Aunor. Bisan pa’g ang moralidad dili lakip sumbanan sa pagka-National Artist—kay lagi ang binuhatan sa pagmugna ra man unta’y tagaa’g pagtagad sa pagpili—gipasabot ni Aquino nga mao ra’g di angay panaminan si Aunor. Bahala’g sinaw pa sa opaw ni Aquino ang bulawanon nga mga nabuhat ni Aunor isip artista nga dagha’g gikadugang sa atong kulturang Pilipino, gawas pa sa iyang kadaogan sa gawas sa nasod nga gihatag nato’g dakong garbo.
Sulondon baya, angayan nga role model sa mga Pilipino si Aunor. Kay bisan tinuod pa ang pasangil kabahin sa ginadiling druga, dayag nga wala kini kapugong sa iyang padayong paghimo og premyadong mga salida. (geemyko@gmail.com)