MARTES na! Kumusta kamong tanan diha ug unsay inyong gikalingawan? Padayon lang ha, unya ayaw kalimti ang pag-ampo ngadto Kaniya sa taas!
Sa atong pagpadayon, giingong Zero ang siyudad sa Davao kung ang hisgutan ang mga tawong misupak sa balaod sa rice hoarding.
Hinuon, ang maong hisgutanan gituldokan sa kapulisan diha sa ilang way puas nga pag-monitor sa pipila ka mga bodega sa mga dagkong negusyante.
Kung duna may nakasuhan sa kaulohang Manila, kini ang magsilbing kapanaminan sa pipila ka negusyante sa Davao region nga di mohimo sa ingon.
Bugtong maayong plano sa National Food Authority (NFA) ang makatubag niini kung ugaling magkulang kita sa suplay sa bugas.
Sumala pa sa atong mga nahinabi nga ang gobyerno ang motubag niini tungod sila mismo ang nasayod kung paunsa misaka ang presyo sa bugas, butang nga ang pagtaas sab sa mga abuno nga i-nangkat sa laing nasud ang masulti sa gobyerno.
Husto na unta nga natagamtaman sa katawhan ang tag P18 matag kilo sa NFA rice, apan nahimo kining kontrobersiya human nga misaka kini ngadto sa tag P27 matag kilos diin tag duha lamang ka kilo ang puwedeng mapalit sa matag usa ka pamilya.
Manghinaut kini nga matag karon ug unya, makatilaw kita'g lamian nga klase sa bugas tungod ni nato kini mapansin ang mahal nga presyo kung maayo lang ang kalidad niini diha sa atong lamesa.
Mga higala, ania ang atong mga nahinabing lungsuranon:
Wa nay mahimo
"Wala na kitay mabuhat kay nagmahal man sab ang tanan nga palaliton karon. Ang atoa nalang buhaton kay ang saktong pag-plano sa pamilya ug pagpa-eskuwela sa atong mga anak aron naa silay tarong nga kaugmaon." Regie V. Eslana, PESO staff, Davao City
Magtanom
"Nganong di man ta mananum og daghan binhi sa bugas. Naa man tay mga kugihan nga mga farmers nganong ipang export paman nato ang atong mga bugas? Usahay malibog ta aning gobyerno, mopalit ta'g mga way lami nga bugas sa Thailand ug Vietnam tapos naga export tag bugas. Seguro ang pagdala lang ani sa NFA maoy kulang." Allyson P. Mier, Purok 4, Barangay 23-C, Davao City