ANG Sun.Star Davao Superbalita ug Social Security System (SSS) Davao nagpahibalo sa mga suking tigbasa nga di palabyon ang kahigayonan nga makasalmot sa ika-15 nga anibersaryo sa Superbalita karong Hulyo 24, 2014 didto sa Davao City Recreation Center (kanhi Almendras gym) nga nahimutang sa Quimpo Boulevard, siyudad sa Davao.
Sa maong aktibidad, idalit ang nagkadaiyang serbisyo sama sa registration alang sa buot magpa-miyembro ug konsultasyon sa mga miyembro nga dunay suliran sa ilang SSS.
"Maka-offer ang SSS Davao og registration sa mga non-SSS members, ug consultation aron matubag ang ilang mga concerns," sulti ni Wil Anthony Anacleto, Accounts Officer sa SSS Davao atol sa gihimong meeting uban sa tigsuwat.
Si Anacleto nagkanayon nga mamahimo pang makapa-miyembro ang si bisan kinsa nga wa pa nag-edad og saysenta anyos sa maong adlaw.
Dihang gipangutana kung pila ka mga suking tigbasa sa Superbalita ang ilang maalagaran sa maong adlaw, siya nagbutyag: "Wala tay limit sa number of clients. Basta naa pay client, amo gyud paningkamotan nga maatiman ilang problema."
Tungod niini, giawhag ang mga suking tigbasa sa Superbalita nga moadto sa maong lugar diin himuon usab ang Libreng Gupitan uban sa Arlyn L. Basquez Academy of Beauty, Inc., konsultasyon sa mga miyembro sa Philhealth, Job Matching uban sa PESO Davao, magical show, ug raffle sa mga nindot nga premyo.
Mga sponsors sa maong aktibidad mao ang City Government of Davao, New City Commercial Center, Nature Spring, St. Augustine Gold & Copper Limited, Phoenix Petroleum Philippines, Pepsi-Cola Products Philippines, Inc. ug 90.7 Love Radio Davao.