BACOLOD

Gisakya'g mga kalag


COMVAL PROVINCE - Nanglimbawot ang balahibo, nakurat ug nangurog sa kahadlok ang trisikad driver human kalit nahanaw ang gituohan niyang kalag sa bata nga nalumos nga nagpahatod sa tulay alas 10:00 sa gabii didto sa Barangay Poblacion, lungsod sa Compostela di pa lang dugay.

Si Manolo Robles, 27, pedicab driver, taga Cateel, Davao Oriental ug kasamtangang nagpuyo sa lungsod sa Compostela nagbutyag nga ang suod niyang higala nga si Anong kalit miundang pagmaneho sa iyang trisikad kay nahadlok sa kalag.

Si Anong giingon nga, tungod sa kahadlok, mipauli sa lungsod sa Cateel.

"Kadto si Bay Anong, di man gyud to bakakon kay kababata nako to siya. Ug nasayod ko kung unsa katinuod ang iyang gisulti nga nasakyan siya og kalag sa bata nga namatay sa tulay. Mao toy hinungdan nga miundang sa pag-drayb,” sulti ni Robles.

Mao kini ang pahayag ni Robles nga samtang nag-istoryahanay sila sa grupo sa mga drayber sa tubaan sa lungsod sa Compostela.

Gibutyag nga sa tinguha nga makatigom og daku-dako, namasada si Anong bisan lapas na sa alas 10:00 sa gabii.

"Naa to siyay pasahero nga gihatod didto sa Purok 11, duol sa sementeryo ug dihang nakanaog na ang pasahero, nakit-an ni bay Anong ang bata nga nangamay nga buot mosakay nga daw naggikan sa sulod sa sementeryo,” sulti ni Robles nga nagkutlo sa asoy kaniya sa higala.

Matud pa nga gipasakay ni Anong ang maong bata, ug dihang gipangutana kung asa moadto, mitubag nga didto magpahatud sa tulay sa Algon sa Barangay Osmeña.

Samtang nagdagan ang trisikad, matud pa sa asoy, daw nabatyagan ni Anong nga hinay kaayo modagan ang trisikad tungod sa kabug-at sa iyang karga.

Ang bata nga pasahero giingon nga walay tingug-tingog ug daw magul-anon nga nagtan-aw sa unahang bahin sa dalan.

"Gipangutana ni Bay Anong kung mag-unsa ang bata didto dapit sa tulay, apan wala mitubag -- igo lang mitan-aw kaniya nga ang tinan-awan makahahadlok. Siga ang mga mata sa bata," asoy ni Robles.

Dugang pa niya, dihang duol na sa tulay nadungog ni Anong ang hilak sa pasahero, ug dihang gipangutana kung naunsa siya -- wala gihapon mitubag.

Pagkataud-taod, miingon ang bata nga: "Dinhi lang ko, Nong!"
Natingala si Anong nganong mikanaog ang bata nga wa may mga tawo sa dapit.

Sa pagtunol sa pamilte sa bata, nasiplatan ni Anong nga basa ang sinina sa bata, hilabihan ka bugnaw sa kamot sa bata nga daw "ice".

Ang kahadlok ni Anong, suma pa ni Robles, nadugangan dihang sa iyang pagsukli sa pamilite kalit lang nahanaw ang bata sa iyang panan-aw.

Dugang gibutyag ni Robles nga niadtong gabhiona, iyang nasugatan si Anong nga gisakyan og lima ka mga bata, duha kanila naglingkod sa likod sa trisikad.

"Naglibog gani ko nganong miingon man si Bay Anong nga usa ra ka bata ang iyang pasahero nga sa akong nakit-an lima man sila."

Sa pagsusi sa Superbalita nasayran nga ang tulay, pila na ka tuig ang milabay, may usa ka bata nga namatay human nalumos samtang naligo uban sa mga higala.

style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph