KARONG panahona bisan unsa na lang ang himuon sa mga tawo nga gisanapan sa dautang espiritu basta lang makakwarta ug makapamerhisyo sa ilang isig ka tawo.
Hinungdan nga dili gyud kita mokompyansa, matud pa sa uban nga ilaron man gani ta sa atong kadugo unsa na lang kaha dili nato paryente.
Ug usa pa, bisan asang dapit anaa kining mga sakay sa panahon nga dili lang nato mailhan ang ilang mga tuyo.
Niadtong niaging adlaw, kapin sa P70 mil nga kantidad sa mga imported nga medisina ug mga importanteng butang ang nawagtang gikan sa usa ka babaye nga gituohang giilad sa nagpatuong kargador sulod sa Integrated Bus Terminal sa Agora ning siyudad sa Cagayan de Oro.
Igo na lang intawon nga nagpatala sa Police Station 3 sa Agora si Jennibabe Villaflor, 61, minyo ug lumad nga taga Valencia City, Bukidnon.
Gisaysay sa biktima nga gikan siya sa Cebu ug pauli na sa Bukidnon dihang pag-abot sa terminal ning siyudad gitabo siya sa duha ka mga lalaki nga nagpaila nga porter.
Mihanyag ang duha ka lalaki nga maoy modala sa iyang duha ka mga baga ug ibutang compartment sa bus bugti sa P60 nga suhol.
Sa pag-abot sa Mambatangan Bukidnon diin adunay quarantine area gisusi sa biktima ang iyang bagahe apan dako na lamang ang katingala niini kay wala sa compartment sa bus ang iyang mga karga.
Nagtuo si Villaflor nga ang nagpailang mga porter maoy nagkuha sa iyang mga butang. Gihulagway sa biktima ang duha ka mga suspetsado nga pulos kini nagsul-ob og jersey kolor blue ug adunay numero nga 11.
Mao lage ning giingon nga dili ta mokompyansa. Unta gisunod gyud og tan-aw sa biktima ug gisiguro nga nakasulod sa compartment sa bus ang iyang mga karga.
Karong panahona kinahanglan na gyud nga kitang tanan segurista tungod kay daghan na kining mga sakay sa panahon sa atong palibot nga dayong moatake bisan sa gamay nga binta.