SA AGOSTO 30 magsugod na ang kampanya sa Gilas Pilipinas alang sa FIBA World Championship didto sa Spain.
Sa giapilan nilang mga tune up games sa milabay'ng mga adlaw, isip kabahin sa pagpangandam, kausa lang nakatilaw og daug ang Gilas Pilipinas sa pito ka mga tim nga kontra pinaagi sa Egypt niadtong Lunes.
Sa 6 ka nasud nga nakontra, gipaagi sa bangag sa dagum sa Gilas ang France ug Dominican Republic. Nakadaug man tuod ang maong mga nasud, apan mipakita gyud og maayong kombati ang Gilas batok kanila.
Usa sa mga nakitang hinungdan sa pagkapukan sa Gilas sa 6 ka mga nasud, mao ang pagkahigante sa mga kontra kon hisgutan ang katas-on. Kay ang uban kanila mosukod na man og 7 feet o labaw pa niini.
Samtang sa Gilas, si naturalized National Basketball Association player Andrei Blatche lang ang taas sa mga Pinoy nga dunay sukod nga 6'11", apan layo ra sa tapad sa ubang mga kontra.
Dunay abilidad ug di mabentahaan ang Gilas sa shooting gumikan kay daghan ta niini sama kanila ni Jeff Chan, Paul Lee, ug uban pa. Diri ra gyud ta pildihon sa gitas-on sa player.
Apan taliwala ning tanan, gilauman gihapon nga mopakita og maayong labok ang Gilas sa pagsugod sa pormal nga kompetisyon karong Agosto 30.
Wala man tuod ta maglaum nga mokampeyon sa torneyo apan nagtuo kita nga mopakita og maayong kombati ang atong mga magdudula pinaagi sa paggiya nila ni Coach Chot Reyes nga ubanan sa pag-abag ni Talk 'N Text headcoach Norman Black ug uban pa.
Kay alang kanato di ang pagdaug ang mas bililhon ning higayona, kon di ang mapabati nato ang atong presensiya isip Filipinong nasud nga kabahin sa mga maayo ug banggiitang tim sa tibuok kalibutan sa natad sa basketball human ang halos 40 ka tuig nga pagpinaabot sa nga makasalmot sa gikonsidera nga "torneyo sa tanang mga torneyo" sa kalibutan - FIBA World.
Busa, 'Laban Pilipinas, Puso'.