Edfer C. Rigondon
Pitalo, San Fernando, Cebu
ANG linung-ag nga kan-on nga sinagulan ug linuyang nga saging o linusak nga kamoteng kahoy o bagon, tawgon og lining-ag nga sinaksak sinagol.
Ingon niini ang hulagway sa nasudnong basket ball team Gilas Pilipinas nga nasalmot sa nagpadayon nga FIBA World Cup didto sa Espanya. Kay ang Gilas nakakuha sa Silver Medal sa FIBA Asia nga gihimo niadtong milabayng tuig 2013.
Ang nakaparat kay ang Gilas nanguha og mga langyaw: sila si Marcus Douthit ug si Andray Blatche. Si Douthit gikuha sa Gilas niadtong Jones Cup mga duha ka tuig na ang milabay, ex-drafee sa LA Lakers apan wala madala sa NBA regular season.
Si Blatche gikuha sa team Gilas kay kuno naturalized Filipino citizen. (Mahimo ba diay nga i-naturalize ang walay residensya sa Pilinas? Dili ba nagkinahanglan man og igo nga panahon ang usa ka langyaw una ma naturalized? Kamo nala’y hubad niining matanga sa palakaw.
Si Andray Blatche regular nga magdudula sa NBA, center sa Brooklyn Nets sa New York, gani nakasulod sa NBA playoff karong tuiga. Ug kaha agi’g paglikay sa mga pagsaway gideklarar sa mga opisyal sa Gilas nga “naturalized”. Kining maong matang sa palusot
usa ka pangilad ngadto sa ubang kanasuran nga mosalmot sa Fiba World Cup.
Gani, kining gihimo sa Gilas gibabagan ni Sec. Hermenio Coloma Jr. apan ambut ug ngano nga nakalusot, kay matod pa kuno aprobado sa kongreso.
Busa karon ang Gilas Pilipinas nagdala sa bandera’ng Pilipinhon nga sinagulan og mga langyaw. Kining nasudnong team sa Gilas dili commercial team busa, lunlun unta mga Pilipino lang ang modula. Kini sa Blatche walay delicadeza. Tugutan nato nga ikaharung sa Pilipinas ang team USA, kun si Blatche usa ka American citizen unsa kaha’y iyang bation inig dula na niya nga kaatbang ang team USA nga siya nagdala naman sa bandera sa Pilipinas.
Subong palandungon nga hasta ang paugnat sa kusog sa atong nasud gisudlan og usa ka matang sa palusot. Bahala lang unta kon mapildi ang Pilipinas basta lunlun Pilipino ang nanuwa total duna man ta’y dungug nga nakab-ot sa FIBA Asia.