GIBUTYAG ni Cagayan de Oro City Commission on Elections (Comelec) Officer Atty. Aleli Ramirez nga ubay-ubay pa sa mga botante ang wala nakuhaan og biometrics.
Gibutyag niini nga ning siyudad sa Cagayan de Oro mokabat sa 33 mil ka mga botante ang walay biometrics ug gikabalak an niining basin dili sila makaboto sa umaabot nga eleksyon tuig 2016.
Ang biometric nagtumbok sa mga tekniks pagtino pinaago sa pagsukod sa pisikal nga karakter nga mahimong awtomatik nga masusi.
Gani, daw pipila lamang ka mga tawo ang nahidangat sa ilang buhatan aron sa pagparehistro ug unta himoun kining oportunidad sa katawhan mintras wala pa kaayo gaparehistro.
Matud ni Ramirez nga magdala lamang og balido nga identification card ug moadto sa ilang buhatan tungod kay bukas sila matag adlaw.
Prayoridad usab sa Comelec nga mahatagan kon makuhaan og biometrics ang ubay ubay ka wala niini.
Kahinumduman nga polisiya sa maong buhatan nga moestablisar og limpyo, kumpleto, ug updated nga listahan sa botante pinaagi sa mando nga saktong pagkuha sa hulagway, fingerprints, pirma nga mao ang gitawag og biometrics sa proseso sa pagparehistro.
Kini gideklarar ubos sa Comelec Resolution 9853.
Kung ang usa ka botante mahidangat sa buhatan aron moaplay sa pagparehistro ang iyang biometrics kuhaon sa digital nga paagi.
Kini nagpasabot nga kuhaon kini sa imahe sa digital apil iyang hulagway ingon man figerprints ug pirma gamit ang COMELEC's Voter Registration Machine diin mao ang desktop computer, nga dunay digital camera, fingerprint scanner ug signature pad nga naka-attach.