GIPANGDUDAHANG mga miyembro sa Acetylene gang ningsuway paglungkab sa usa ka pawnshop dakbayan sa Lapu- Lapu sa miaging gabii.
Apan way bisan usa ka butang ang nakuha sa mga kawatan gikan sa Super R pawnshop nga anaa mahimutang sa Sergio Osmeña, Brgy. Gun-ob sa mao nga dakbayan kay nitingog ang alarma system hinungdan nga nagkatibuwaag sila sa pagpanagan.
Ang tagdumala sa pawnshop mihimo gilayon og initial inventory sa mga butang human sa hitabo ug ilang nasuta nga way nakuha ang mga kawatan.
Gibutyag ni PO2 Jason Elnar sa Station 3 sa Lapu- Lapu Police Station (LLCPO) nga mga alas 11:20 sa miaging gabie sa dihang mitingong ang alarming sytem sa maong pawnshop.
Wa pa matino sa kapulisan kon pila ka kabuok ang mga kawatan nga ningkaratil sa pagpanagan sa pagtingog sa alarm system.
Matod ni Elnar nga way close circuit television (CCTV) camera ang maong pawnshop apan protektado ang maong prendahanan sa Security & Systems Monitoring, Inc. (SSMI) alarm system.
Ang maong grupo sa mga kawatan nakamugna na og lungag sa konkretong bungbong sa luyong sa pawnshop.
Ang lungag giingong masudlan og usa ka tawo ug di makita kay bakante ang luna sa likod.
Dugang ni Elnar nga kon wa pa motingog ang maong alarm system, possible nga makuha sa mga kawatan ang laptop sa ahensya.
Gani, nahabilin ang mga gamit sa mga kawatan pagguba sa luyong bahin sa ahensya.
Kini naglangkob sa acetylene cutting outfit, duha ka screw bars, usa ka flat screw, kutsilyo, hydraulic jack, duha ka hand drills ug wire cutter.
Ikaduha na kini nga operasyon dinhi sa Metro Cebu sa Acetylene gang nga napalka.
Niadtong sayong bahin sa Hulyo ning tuiga, napakyas usab ang gidudahang mga sakop sa Acetylene gang sa pagsulod sa upat ka mga pawnshop sa Brgy. Poblacion, dakbayan sa Naga.
Ang mga kawatan ning-abang og balay diin sila naglungag padung sa drainage system nga konektado ngadto sa upat ka mga prendahanan sa dakbayan.
Apan ang giingong kadaghan sa mga sagbot nga nakababag sa agianan ug nakasampong sa tubig maoy nakapugong sa mga kawatan sa pagpadayon sa ilang tuyo.
Nadiskobrehan sa caretaker ang ilang gibuhat, apan nakalayas na sila gikan sa balay nga giabangan.
Napalgan sa kapulisan ang kinubkoban sulod sa balay nga gitabunan og katre aron di makita kon dunay mosulod. (John Paul Pilapil Sun.Star Superbalita)