DUNAY kinomedya nga tigmo kung unsa kuno ang kadautan sa tigulang. Ang tubag kay kalamunggay kay mao ra kini ang makayang lutuon sa hamtong. Dili na puwede ang karne busa utanon ug prutas na lang tawon ang kaunon sa kabus.
Kung wa ko masayop mga 65 anyos na ang average lifespan sa mga babayeng Pinoy samtang 63 sab ang lalaki.
Suwerte kaayo ang mga tawo nga niabot na'g 70-80 anyos kay bunos na kini gikan sa Kahitas-an.
Ang akong inahan nagpangedaron na'g 89 anyos karong Nobyembre ug kaluoy sa Diyos lagsik pa ug layo sa sakit.
Makahinumdom pa siya sa pangalan sa iyang mga apo nga sobra 40 ka buok hasta ang ilang mga birthday ug anibersaryo sa kasal sa iyang mga anak.
Suwerte sab karon ang mga tiguwang kay giatiman sila sa gobyerno.
Kung moabot na'g 60, mahimo na silang card-bearing member sa Over-60 Club o Senior Citizen diin maangkon nila ang daghang benepisyo ubos sa R.A. 7432 nga gi-amenda sa R.A. 9994 o ang naila nga Expanded Senior Citizens Act of 2010.
Apil dinhi ang 20 percent nga diskuwento sa presyo sa pagkaon, medisina, pamasahe, tan-aw og sine ug uban pa.
Hastang lipaya sa mga hamtong kay ila nang nakita nga bililhon sila sa gobyerno.
Gawas niini, anaa pay gidugang ang Kongreso. Bag-o lang gibalita nga nipasar sa second reading sa Senado ang Senate Bill 712 ni Senate Pro-Tempore Ralph Recto sa paghatag og PhilHealth insurance sa tanang seniors.
Adunay mandatory coverage sa PhilHealth sila si lolo ug lola bisan unsa pa man ang estado sa ilang kinabuhi.
Kung mahimo nang balaod, awtomatik nga ma-enroll sa PhilHealth ang mga seniors nga wala pa nahiapil o dili dependent o indigent.
Gipangandoy sa maong balaudnon nga adunay "universal health insurance" ang tanang Pinoy kay lagi lumulupyo man sila sa nasud.
Matud pa ni Senador Recto nga sa dihang huypon ni lola ang kandila sa iyang ika-60 nga birthday cake hangtud nga siya mamatay miyembro na siya sa PhilHealth.
Mokapin 2.2 milyon ka hamtong ang makabenepisyo niini nga adunay budget nga P5.2 bilyon matag tuig.
Sa pagkakaron, ang PhilHealth adunay 31.27 milyon ka miyembro ug 45.63 milyon nga dependent o 76.90 milyon sa 90 milyon ka Pinoy.
Niadtong 2013, nibayad ang PhilHealth og P55.55 bilyon isip benepisyo sa mga miyembro. Kung maapil na unya ang tanang senior sa PhilHealth, hayan nga halos tanang Pinoy ma-cover na sa maong buhatan.
Salamat sa mga senador ug congrats ninyo nga Tig's.
10th Anniversary
Gisaulog karong adlawa ang ika-10 nga anibersaryo sa Luna Legal Resource Center, Inc., usa ka NGO nga nagtabang sa mga kabus nga babaye ug bata nga gidagmalan ug giabuso.
Gitukod kini niadtong 2004 isip tubag sa pribadong grupo sa pagpasar sa R.A. 9262 o ang Anti-Violence Against Women and their Children Act of 2003 ug sa Women Development Code of Davao.
Aduna kini mga programa sama sa Comprehensive Legal Assistance, Integrated Legal Advocacy Work ug Continuing Legal Volunteerism, Education and Training. Nahimutang kini sa 63 V. Mapa St. Congrats pod!