AHENTE og sigarilyo ug iyang driver gipriso sulod sa van sa duha ka mga tulisan nga ningsakiyo sa ilang halin niadtong Biyernes sa alas 2 sa hapon sa Sitio Cabangcalan, dakbayan sa Bogo.
Si Gary Bigno, 32, ulitawo, taga Barangay Tisa, dakbayan sa Sugbo ahente sa Fortune Tobacco Corporation ug ang driver nga si Reybombom Guinto, 29, ulitawo, taga Barangay Luz, dakbayan sa Sugbo, anaa pa sa kakuyaw dihang ni-report sa kapulisan.
Si PO3 Ryan Alarde, imbestigador sa Bogo Police Station nga nahinabi sa dySS Super Radyo ug Sun.Star Superbalita, nagkanayon nga naghunong ang sakyanan sa mga biktima kay nagbaligyag sigarilyo sa ilang suking tindahan.
Niabot ang duha ka mga tulisan sakay sa Honda kolor itom nga motorsiklo nga pulos nagdalag armas ug mideklarar og tulis hinungdan nga si Bigno wa makalihok.
Gikuha sa tulisan ang P25,000 nga halin diha sa iyang bulsa.
Human nakuha ang kwarta, gidala silang duha ngadto sa likod sa sakyanan dayon gipriso sa van, samtang ang mga tulisan misakay sa ilang motorsiklo ug wa na masuta kon asa padulong.
Ang tindera sa tindahan nga gibaligyaan nilag sigarilyo ug ang mga tawo sa lugar maoy ningtabang sa mga biktima sa pagpagawas sa van.
Matod pa ni Alarde nga ang usa ka tulisan nagtabon sa iyang nawong sa sinena, nagdala og kalibre .45 nga pistola, nagsul-ob sa sininang blue, naka-shorts og maong, nagkawog kolor itom, samtang ang usa nagdalag .38 caliber revolver, nag-helmet og kolor yellow, itom nga jacket ug cargo shorts.
Si Alarde niingon nga duna na silay lead sa imbestigasyon nga gisubay sa pagkakaron.