SI Undersecretary for Livestock Jose Reaño sa Department of Agriculture (DA) niingon ning bag-o pa lang nga palig-unon ang panukiduki kabahin sa paggamit og mga lumad nga tanom isip sagol sa feeds og tambal alang sa hayopan.
Si Reaño mipahibalo niini atol sa ika-93 nga anibersaryo sa Ubay Stock Farm (USF) sa Bohol.
Matod ni USEC Reaño, ang lakang pinasubay sa paningkamot sa pagtabang sa mga mag-uuma nga makakab-ot og ganansya pinaagi sa pagkunhod sa gasto sa produksyon.
Ang DA USEC naghisgot usab sa paggamit sa mapuslanon nga bakteryang Lactobacillus plantarum nga nakaplagan nga mopadugang sa protina sa lalog sa hayopan. Dugang pa ni Reaño, adunay mga plano nga usbon ang Republic Act nga nagmando sa commercial feed production, aron malakip ang mga elemento sama sa amino acids, ug cellulose nga makita diha sa lumad nga mga tanom.
Sa iyang ika-93 nga kasumaran, ang USF, mao ang usa sa labing karaan sa nasud. Natukod kini niadtong 1917 ug giproklamar sa Gobernador General sa Pilipinas niadtong Septembre 17, 1921.
Ang pasilidad mao usab tingali ang pinakadako sa nasud, sa gidak-on nga 3,600 ektaryas. Ang mga kalihokan sa stockfarm naglakip sa applied research sa pagpasanay ug nutrisyon sa mga hayop, ug conservation sa lumad nga hayopan. (PR)