Roldan: Viva Senyor San Miguel

SEGURADONG daghan ang mahubog ug mabusdik sa kabusog. Bisperas karon sa kapistahan ni Senyor San Miguel.

Sama sa nailang mga patron, daghan usab ang deboto ni San Miguel.

Sa katekismo naila si San Miguel nga Arkangel tungod kay siya ang tuong kamot sa Diyos nga nanalipod kanato batok sa mga dautan.

Kung atong makita ang iyang rebulto, nagsul-ob siya'g sapot sa sundalo ug nagdala'g espada nga andam niyang itigbas sa demonyo nga anaa sa iyang tiilan.

Apan daghan ang nangutana kung nganong patron man siya nga dili man siya tawo?

Matud pa sa Wikipedia, ang buot ipasabot sa "Michael" kay "Kinsay sama sa Diyos?" Siya ang hataas nga angel sa pagtulun-an sa Judeo, Kristiyanos ug Islam. Makatulong higayon nga nahisulat ang Michael sa Book of Daniel isip "prinsipe nga nibarog alang sa kabataan sa piniling katawhan".

Sa Bag-ong Kasulatan, si San Miguel maoy nangulo sa sundalo sa Diyos batok sa puwersa ni Satanas diha sa Book of Revelation diin iyang gibuntog si Satanas sa giyera sa kalangitan.

Nagsugod ang mga sangtuaryo ni San Miguel sa 4th century sa pagtuo nga angel siya nga mananambal sa Phrygia (Turkey) hangtud nga siya ang tigprotekta ug pangulo sa sundalo sa Diyos batok sa panuway.

Sa pagtulon-an sa mga Romano Katoliko, si San Miguel adunay upat ka papel sa iyang pagka-angel. Una mao ang iyang pagpangulo sa sundalo sa Diyos ug pwersa sa kalangitan batok sa impiyerno. Simbulo siya sa mga hiyas sa espirituhanong manggugubat.

Ang ikaduha niyang papel mao ang iyang pagka-angel sa kamatayon (angel of death), nga maoy mag-uban sa kalag sa namatay ngadto sa langit. Sa oras sa kamatayon, mokunsad siya gikan sa langit ug mohatag sa kalag og kahigayonan nga mobawi sa iyang dautang binuhatan una motabok sa laing kinabuhi nga gikalagot kaayo sa mga demonyo.

Ang ikatulo niyang papel mao ang pagtimbang sa kalag sa usa ka perpektong timbangan kung angayan ba kini sa langit o sa impiyerno.

Ang ikaupat nga papel mao ang iyang pagka-espesyal nga patron sa mga piniling katawan sa Daang Kasulatan nga mao usab ang magbalantay sa Simbahan, busa dili malikayan nga gipili siyang patron sa military orders of knights sa Middle Ages ug nahimong patron sa daghang siyudad ug nasud.

Ang mga protestante wala mangayo og pagtabang (intercession) sa mga santos. Ang Anglicans adunay pag-ampo ngadto kang San Miguel ug San Juan nga Magbubunyag. Apan nag-ila ang dominasyong protestante sa duha ka arkangel nga si San Miguel ug San Gabriel.

Aduna akoy nabatiang mga istorya kabahin sa pag-ayo sa masakiton, pag-protekta gikan sa disgrasya ug katalagman nga hinimuan kuno ni San Miguel.

May tawong deboto ni San Miguel nga nag-ayo ilawom sa iyang kotse nga guba. Gitangtang niya ang duha ka ligid sa atubangan ug gitukuran niya'g jack apan kay humok man ang gitungtungan sa jack nadiskarel kini.

Apan unsang unsaa nga naay nakaputi nga tawo nga daling nipugong sa paghagsa sa kotse sa iyang dughan ug nibitad kaniya sa paggawas. Wa siyay tatsa ug wa na pod ang tawo. Si San Miguel kaha to?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph