Migallen: Reyes nagpadiki-diki

HANGTOD karon padayon gihapon ang panawagan sa mga netizens nga ilisan si Chot Reyes isip headcoach sa Gilas Pilipinas.

Mabasa ug makita nato sa mga social web site ang mga yangongo ug kasagmuyo nga gipadayag sa mga magdadayeg sa Gilas Pilipinas tungod sa bati nga performance niini sa Incheon Asian Games.

Gawas sa performance, wa usab malilong sa kadaghanan ang kagubot nga mitumaw sa team taliwala sa nagkahugot na nga kampanya. Buot ipasabot mao ang panagbikil tali ni Reyes ug sa naturalized nga si Marcus Douthit.

Bisan og crucial ang sitwasyon, wa gyud molubad ang garbo ni Reyes ug iyang gibangko si Douthit sa ilang duwa batok sa South Korea nga susama ra unta og gitas-on.

Ang tuyo nga pag-itsa ni Douthit sa ring sa Kazakhstan aron kini ma-overtime nga maghatag unya nila og kahigayonan nga makaabot og 11 puntos ang ilang labaw aron sila mo-qualify sa sunod round, maoy nagdugang og lama sa ilang kampanya.

Kini ubos ra usab sa kamanduan ni Reyes. Ang maong binuhatan nagpasabot lang kon unsa na gyud ka frustrated ang Gilas aron makasulod sa semifinals round.

Apan taliwala ning tanan, daw sa wa may timailhan nga moluwat si Reyes sa iyang katungdanan. Way kalahian si Reyes sa ubang politiko sa nasod nga magpabaga sa ilang nawong bisan og wala nay gusto kanila ang kinabag-an.

Sukwahi sa gihimo sa coach sa Spain nga si Juan Antonio Orenga nga dali kaayong niluwat sa iyang katungdanan human mapakyas ang Spain pagsulod sa semifinals round sa dihang gipakaging kini sa France sa knockout stage sa Fiba World Cup.

Pero kini si Reyes daghan pa kaayong katarungan unya maayo ra bang moyawit ug daw sa gusto pang magpapugong.

Porbida sab si Chot. Nagtuo siguro ni siya nga siya ray makamao. Kadaghan pang kapilian. Mora ra ba’g nadala si Manny V. Pangilinan (MVP), ang bigboss sa Gilas.

(junmigs0622@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph