MOKABAT sa 15 ka mga residente ang giingong napaakan sa irong buang nga naglatagaw diha sa Gumamela St., Barangay Carmen ning siyudad sa Cagayan de Oro.
Ang mga biktima nataranta nga nagpabakuna og anti-rabies sa animal bite sa City Health Office ning siyudad.
Saysay sa usa sa biktima nga mao si Leonora Gocor nga igo na lamang siyang naglingkod dihang giduolan sa iro ug gipahit iyang tiil.
Nakurat ang biktima tungod kay butyag usab sa iyang silingan nga napaakan gihapon sila sa iro hinungdan nga ang maong iro ang giposposan usab og kahoy.
Nasuta nga positibo sa rabies ang maong iro nga nakapaak hinungdan nga nanawagan ang City Health nga kung kinsa pa ang napaakan sa maong iro magpabakuna deretso sa maong buhatan.
Niaging tuig 43 ka mga iro ang giingong positibo sa rabies ug misaka kini ning tuig 2014 tungod kay 1st quarter pa lamang sa tuig miabot na sa 33 ka mga iro ang nagpositibo sa rabies.
Gibutyag ni Dr. Perla Asis, kinsa city veterinary officer, nga sagad sa positibo sa rabies ang mga iro nga galatagaw sa kadalanan tungod kay walay mga atiman.
Gihangyo usab niini ang mga nanag-iya sa iro nga responsable sa ilang binuhi tungod kay dili sayon kung kini makapaak.
Matud ni Asis nga nakigkoordinar na siya sa mga kabarangayan sa siyudad nga kung adunay iro nga makita nga naglatagaw sa kadalanan ug walay tag-iya dakpon kini ug dalahon sa ilang buhaton tungod kay wala silay mahimo niini gawas sa "mercy killing."
Nasayran nga ang irong buang nga nakapaak sa 15 ka mga residente ang gihimakak sa tag-iya ug miingon nga dili siya mobayad sa perhisyo nga hatod sa maong iro.