PAGSUGOD og pa-uso ni Mark Zuckerberg ug iyang mga higala ining Facebook ni-adtong 2004, ang mga bayong-bayong (15-24 anyos) nga kani-adto mga bata pa, maoy pinakadako nga sektor karon nga nag gamit ini nga teknolohiya (Information Techonology) subra dekada na ang milabay.
Matod ni Dr. Grace Cruz, nga maoy nangunay og himo og pakisusi sa “Media Use and Youth Lifestyle” nga napatik sa mga nasudnong pamantalaan ni-adtong Pebrero, ang konsumo sa pag-gamit sa naandan nga mass media (radio, telebisyon og pamantalaan) nagka-anam na og kahinay karon sa mga batan-on lakip mga batang mamumuo. Hinuon, kini wala magpasabot nga ang mga batan-on karon dili na hilig mobasa kay kasagaran manguha, mobasa og motan-aw naman lang og balita ug impormasyon pina-agi on-line. Gani ako, isip magtutudlo, mismo nakakita nga gamay na lang kaayo ang mga tinun-an nga mobisita sa library kay igo naman lang mo Google sa ilang gustong pangitaon sa internet, makuha na diha-diha ang tubag o ilang gipangita.
Sa gihimong survey sa Demographic Research and Development Foundation (DRDF) ug University of the Philippines Population Institute (UPPI), unom kada napulo ka batan-on ang regular nga naggamit og internet. Subra sab sa katunga ni-ining gidaghanon ang nagpunay og gamit sa mga social networks sama sa Facebook (FB). Laing 78% ang nanag-iya og mobile phone (cellphones).
Kada usa dunay ipahat nga 6 ngadto sa 35 ka oras matag semana para mag online (magtuon, mag-research, o gamit sa mga social networks). Ang subo kay ang uban dili kahibalo modala ug miresulta sa pagka-adik pagpahimulos og gamit niini. Ang uban dili na ganahan motungha ug magluya na panahon sa eskwela.
Sa maong pagtuon, nakita nga mas daghan ang mga batan-ong babaye ang dunay hilig sa paggamit ini labi na kadtong mga ana-a nahimutang, nagtungha o nagtrabaho sa mga dagkong dakbayan itandi sa mga lalaki. Ang pasabot ini, matod ni Dr. Cruz, mas daghang mga batan-ong babaye ang gustong makighimamat og mga higala ug ka-relasyon. Usa kada tulo ini nila moingon nga nakahimamat sila’g mga bag-ong higala pina-agi sa mga social network nga wala gani nila igkita og laing 25% ang nakakitag amigo ug amiga pina-agi sa text pero wala igkita sa personal.
Katunga sab sa mga batan-on karon ang hilig mananw-aw og mga x-rated nga mga salida (movies and videos) kasagaran mga lalaki. Ang uban pinasa ra sab nga mga sex videos sa ilang mga telepono. Ang uban mismo mangunay og record sa ilang kaugalingon nga nakighilawas ug ang uban nakighilawas sa tawo nga dili nila ka-relasyon ug naila-ila lang pina-agi sa text ug online kun FUBU (Fucking Buddy). Kini labing kuyaw nga matakdan og mga sexually transmitted diseases (STD) nga kusog mokatap kon walay insaktong proteksyon og kahibalo.