GIKAALARMA na sa konseho ang pagsaka sa ihap sa nataptan sa dengue ning panahona sa siyudad sa Cagayan de Oro.
Gibutyag ni Konsehal Dante Pajo, kinsa chairman sa komite sa police, fire and public safety sa konseho, nga sobra sa pagdoble ang pagsaka sa kasong dengue hinungdan nga hugot siyang nanawagan sa katawhan nga mas ipalambo ang ilang gilusad nga Operation Dakpa sa City Health Office.
Matud ni Pajo nga mas nigrabe kini karong tuiga kon itandi sa niaging mga katuigan ug tungod niini, gipahimangnoan niini ang katawhan nga magbinantayon gyod kanunay labina gyod ang kanunay nga paglimpyo sa palibot.
Kahinumduman nga natala sa City Health Office nga mokabat na sa 2, 296 ka mga kaso sa dengue sulod lamang sa walo ka bulan diin adunay 19 nga natalang namatay kon itandi sa sa tuig 2013 nga adunay 1,359 nga kaso.
Sa data usab nga gipagwas sa Department of Health-Northern Mindanao, nakita nga mokabat sa 87.3 ka porsiyento ang pagsakay sa kaso diin niadtong bulan gyod sa Hulyo ug Agusto ang sagad sa daghan nga natakbuyan. Adunay natala nga 33 ka mga namatay sa tibuok Rehiyon.
Kahinumduman, usa si Rev. Fr. Raul Bagongon, kinsa assistant parish priest sa San Antonio de Padua Church sa Barangay Nazareth ning siyudad, ang usa sa sa nakabsan sa kinabuhi gumikan sa dengue.
Si City Health Officer Dr. Fe Bongcas hugot usab nga nanawagan sa katawhan nga magbinantayon gyod ug maglimpyo kanunay sa palibot. (SVB)