MINILYON nga kantidad ang gituohang gibitbit sa usa ka katabang gikan sa panimalay sa usa ka opisyal sa polis nga nagpuyo sa usa ka barangay ning siyudad sa Cagayan de Oro.
Nagpatala sa kapolisan ang usa ka polis alang sa usa ka opisyal human kini gikawatan og mokabat sa P1,395,000 nga kantidad sa mga alahas ug cash nga 800 US$ ug 150 Euro$ niadtong milabay nga bulan mga alas 9:00 sa buntag.
Mireklamo ang maong opisyal sa iyang katabang taga Valencia, Bukidnon.
Giingong ang tanang mga alahas nakabutang sa gamay nga sudlanan samtang ang salaping cash sulod sa usa ka pitaka nga gibutang sa steel cabinet sa master’s bedroom.
Ang mga alahas nadiskobrehan niadtong bulan sa Hulyo samtang ang salaping cash niadtong bulan sa Agusto ug gideklara kining nawala gayud bisan pa man sa ilang pagpangita niadtong bulan sa Septiyembre 23 ning tuig.
Gituohang gidala sa maong suspetsado ang mga nawalang mga alahas sama sa usa ka pares nga arites (diamond og gold) nga mobalor og P500 mil, laing pares sa arites nga P500mil, usa ka singsing (diamond & gold) nga mobalor og P300 mil, usa ka wedding ring gold P25 mil, usa ka singsing nga Alexandrite ug gold PMA graduation ring P30 mil, duha ka bangle nga bracelets P40 mil ug ang salaping cash.