Human sa di maayong pagtan-aw sa publiko sa duha ka mga Road Revolution, diin gisirhan ang dagkong mga karsada sa dakbayan alang sa pag-agi sa mga nagbiseklita, pedestrians ug uban pa, nag-amping na mi sa Tindak Bisdak Cebu Folding Bike Society sa pag-apil og mga kalihukan nga sama niadto.
Kini tungod sa among nakita nga mga problema nga hangtod karon wa maplantsa sa organizers. Ang labing daku nga problema mao ang public information drive. Pagpakatap sa mga kasayuran alang sa kalihukan, pagpahimangno sa publiko kalabot sa posibleng paghuot sa trapiko.
Ang mao nga problema nakita gihapon namo sa Green Loop nga gipasiugdahan sa Movement for a Livable Cebu. Hinungdan nga akong gisultihan si Jay Garganera nga di mi makasuporta as a group kon mao gihapon ang mga problema nga among nasugatan kaniadto. Mahimong moapil mi sa individual. Tuod, dihang gipahigayon ni, didto ko sa bukid nagsikad.
Di sa ingon nga wa mi magsuporta sa paghatag og luna sa mga siklista diha sa karsada. Ang amo nga kon duna may kalihukan nga ipahigayon, huna-hunaon usab nga di mapurhisyo ang publiko.
Di lang kay magsalig sa press conferences, kon di molibot sa mga sibyaanan sa radio, TV ug newspapers. Mosulti sa tinuod nga makamugna og trapiko ang pagabuhaton, busa di maayong mobiyahe agi sa mga karsada nga naapektuhan.
Balikbalikon ang pagpahibawo. Magbutang usab og mga pahibawo sa mga karsada nga maapektuhan ug dunay mga tawo sa organizers nga motabang sa pagdumala sa trapiko. Gikinahanglan nga dunay mga galamiton sa karsada nga ipamutang, sama sa road barriers nga iya sa organizers, di kay magsalig lang sa gibiyerno.
Usik nga lugar
Lain pang problema nga akong nakit-an mao ang paggamit og lapad ug taas nga bahin sa karsada. Ang dakung bahin sa karsada, sama niadtong nangaging duha ka Road Revolutions ug Green Loop, wa magamit samtang ang ubang bahin naghuot ang mga sakyanan. Kinsa bay di masuko niana?
Samtang sa laing bahin, naghisgot ang Citom nga mas maayo nga sa sunod adto sa South Road Properties ipahigayon kon duna may laing kalihukan. Sa ako nang gibalikbalik, mas ideal ang karsada nga agianan kanunay sa mga tawo kay mas makita ang resulta sa eksperimento. Mao gani nag-eksperimento sa actual setting aron kon dunay mga sayop, makorihian.
Sa mga karsada nga agianan sa mga tawo mao ang labing maayong dapit nga pahigayunan sa eksperimento.
Bike lane ordinance
Niadtong session sa Miyerkules, niduol ko kang Konsehal Nida Cabrera kay nangutana ko kon matuki ba ang bike lane ordinance. Nisulti siya nako nga duha-duhaan pa tungod sa reorganisasyon.
Kay duna miy meeting kaming editors sa Sun.Star Superbalita, wa na ko magpaabot pa. Maayo ra sab nga nilakaw ko kay ang labing dakong oras gikaon diay sa pulitika sulod sa konseho.
Apan masaligon ko ingon man ang akong mga kauban sa Tindak Sugbo nga uyonan ang ordinansa. Ang pagpalabang sa ordinansa mao lay sinugdanan. Ang pagbutang og bike lane bisan usa lang una ka karsada isip pagsugod maisip nang kadaugan sa mga siklista sa Sugbo.